Primeiru Ministru, Taur Matan Ruak, enkontru ho Ministru Koodenadór Asuntu Ekonómiku, Joaquim Amaral, iha Palásiu Governu, tersa (25/08). Imajen/Mídia GPM

DILI, 25 agostu 2020 (TATOLI)-Primeiru Ministru, Taur Matan Ruak, konvoka enkontru kortezia ho Ministru Koodenadór Asuntu Ekonómiku, Joaquim Amaral, no fó orientasaun atubele aselera serbisu koordenasaun ho liña ministeriál ne’ebé envolve prosesu levantamentu dadus ba implementasaun rekuperasaun ekonómika.

“Objetivu enkontru ho Primeiru Ministru atu hetan orientasaun ba serbisu koordenasaun planu rekuperasaun ekonómiku no atu ajuda setór privadu nasionál sira liuhosi ita-nia sistema Banku Nasionál Komérsiu Timor-Leste (BNCTL, sigla portugés),” tenik Ministru Joaquim, hafoin enkontru ho PM Taur iha Palásiu Governu, tersa ne’e.

Xefe Governu orienta atu liña ministeriál bele serbisu hamutuk halo indetifikasaun ba dezafíu no rekursu sira.

“Ita hatene sei fahe sasán (tuir polítika rekuperasaun ekonómika), ne’ebé sei iha konsekuénsia lojíztika, entaun presiza hametin liña koodenasaun ho instituisaun ne’ebé sei hola parte atu programa ne’e la’o hos susesu,” nia akresenta.

Ministériu Koordenadór Asuntu Ekonómiku (MKAE) konsetra ba planu ne’ebé rekomenda hosi Komisaun ba Elaborasaun Planu Rekuperasaun Ekonómika iha área hanesan agrikultura, turizmu, saúde, edukasaun inklui reforma insitusionál.

“Ita sei konsetra ba medida hanesan nesesidade bázika no apoia setór formál atu regulariza sira-nia an iha segurasa sosiál, liuliu  kompañia no empregadór atu sira bele ba rejistu iha sistema protesaun sosiál ne’ebé Estadu prepara, atubele empregadór sira iha kondisaun mínimu atu moris hanesan sidadaun,” Ministru subliña.

Kona-ba medida fó kréditu, Governu liuhosi MKAE prepara ona atu ajuda no benefisia kompañia sira liuhosi Banco Central Timor-Leste (BCTL), hodi koordena ho Banku Komersiál sira ba implementasaun.

MKAE ninia funsaun prinsipál maka halo koordenasaun ho ministériu relevante sira atu asegura kontinuasaun planu rekuperasaun ekonómika ne’ebé Governu hahú  introdúz.

“Ita faze daruak ba planu rekuperasaun, ba oin iha  faze dezenvolvimentu no kresimentu. MKAE ninia serbisu importante atu halo  koordenasaun di’ak ho ministériu relevante sira atubele  implementa ho rigór medida sira ne’ebé hakarek  ona iha planu dezenvolvimentu no kresimentu iha 2021, atubele kumpre pelumenus rekomendasaun ne’ebé Komisaun Rekuperasaun Ekonómika estabelese no  sai hanesan dokumentu  Estadu,” nia afirma.

Nune’e, governante ne’e dehan, iha faze ezekusaun atu asegura, ministériu sira bele hatama rekomendasaun liña ministériu no tau hanesan ajenda prioridade.

“Iha tinan 2021 ba oin ita foku ona ba planu dezenvolvimentu no kresimentu, ne’ebé MKAE nia misaun importante ho liña ministeriál atubele implementa,” nia hatutan.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here