Prezidente IPG foun, Gabriel Gaspar Aparicio de Oliveira, hamutuk ho Prezidente IPG sesante, Helio Casimiro Guterres, hasai foto hamutuk ho kargu xefia no funsionáriu IPG hafoin seremónia entrega serbisu, iha salaun IPG, tersa (25/08). Imaje/mídia IPG

DILI, 25 agostu 2020 (TATOLI)-Prezidente Instituto Petróleu e Geolojia (IPG) sesante, Hélio Casimiro Guterres, hateten durante nia mandatu laboratóriu no edifísiu maka sai difikuldade boot ba institutu ne’e atu hala’o atividade.  

“Difikuldade boot liu maka laboratóriu, tanba hakarak ko’alia kona-ba dadus kualidade tenke iha infraestrutura ne’ebé maka suporta kualidade. Maibé realidade edifísiu propriu IPG nian mós seidauk iha,” relata Prezidente IPG  sesante, ba Agência Tatoli, hafoin entrega serbisu ba Prezidente IPG foun, Gabriel Gaspar Aparício de Oliveira, iha salaun IPG, Delta, tersa ne’e.

Notísia Relevante: IPG Husu Adisionál iha OJE 2020 Hodi Harii Laboratóriu

IPG Seidauk Iha Laboratóriu Hodi Teste Amostra Mina no Gás

Tanba ne’e, nia iha esperansa katak ho planu sira ne’ebé iha ona, Prezidente IPG foun bele realiza inklui harii ona edifísiu IPG tanba durante ne’e iha ona diskusaun inisiál ho Ministériu Justisa (MJ) no Sekretaria Estadu Terra no Propriedade (SETP).

Difikuldade tuirmai maka espesialista, tanba daudaun ne’e iha de’it jeneralidade maibé seidauk iha espesialista.

“Hanesan espesialista foku ba mina tenke foku ba mina, nune’e mós ba bee ninian, ne’ebé presiza espesialista ba área sira ne’e,” nia subliña.

Desde 2012 hahú buka ona fatin atu halo instalasaun mákina laborátoriu nian, maibé seidauk konsege tanba laboratóriu presiza fatin permanente no seguru atu halo instalasaun.

Ho limitasaun durante ne’e amostra petróleu no minerál tenke lori ba rai-li’ur atu halo análize ka teste ho kustu boot.

Maibé bainhira bele halo análize ba amostra ruma iha rai-laran, IPG kolabora hamutuk ho laboratóriu Universidade Nacional Timor Lorosa’e (UNTL) iha Hera, maski limitadu maibé aproveita hodi bele halo análize ba amostra ne’ebé iha.

Iha orsamentu 2020, IPG mai ho proposta inisiál millaun $2 no adisionál hamutuk millaun $10 atu harii laboratóriu no harii edifísiu própriu, maibé Orsamentu Jerál Estadu (OJE) 2020 la pasa iha Parlamentu.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here