Komandante Polísia Departamentu Nasionál Tránzitu no Seguransa Rodoviária Polísia Nasionál Timor-Leste (PNTL), Superintendente Xefe João dos Reis Belo, hasoru malu ho Primeiru-Ministru, Taur Matan Ruak, iha Palásiu Governu, tersa (25/08). Imajen/Mídia GPM

DILI, 25 agostu 2020 (TATOLI)Komandante Polísia Departamentu Nasionál Tránzitu no Seguransa Rodoviária Polísia Nasionál Timor-Leste (PNTL), Superintendente João Belo dos Reis, husu partisipasaun másimu membru atu hamenus infrasaun regra tránzitu, nune’e sidadaun sira labele viola kódigu estrada.

“Ha’u esforsu no hakarak atu membru Polísia hotu hola parte iha servisu tránzitu, atu nune’e bele minimiza violasaun no infrasaun regra tránzitu iha ita-nia nasaun, tanba ita hatene iha tinan ne’e númeru asidente trafégu barak no mate kuaze ema na’in-40,” tenik Komandante Tranzitu, hafoin hasoru malu ho Primeiru-Ministru, Taur Matan Ruak, iha Palásiu Governu, tersa ne’e.

Komandante ne’e sente onra tanba Xefe Governu konvida atu partilla informasaun ruma relasiona ho servisu anteriór no servisu tránzitu nasionál nian.

Nia dehan, iha ona estratejia atu minimiza vítima asidente iha estrada liuhosi fó edukasaun ba sidadaun sira, liuliu kondutór no motorista sira atu uza via públiku ho di’ak.

“Ha’u foin serbisu seidauk to’o fulan iha departementu tránzitu nasionál, ne’ebé iha estratéjiku hotu atu halo hodi bele mós hamenus asidente trafégu no hatama osan ba kofre Estadu liuhosi infratór sira ne’ebé selu koima,” nia akresenta.

Hahú hosi janeiru to’o agostu, Polísia tránzitu kobre ona $100.000 ba kofre Estadu no sei kontinua hadi’a estratéjiku atubele kontribui maka’as liután.

Komandante João Belo esplika, programa no estratéjika sira ne’e aprezenta ona ba Komandante PNTL, Komisáriu Faustino da Costa, atubele envolve membru Polísia hotu iha tránzitu atubele hatuur regra ba infratór sira ne’ebé viola kódigu estrada.

Diresaun Nasionál Tranzitu mós estabelese ona sistema ne’ebé halo ligasaun ba CCTV hodi pesoál sira bele monitoriza iha 24 oras.

“Ita monitoriza CCTV atu sé mak halo infrasaun iha viola kódigu estrada ne’e bele grava xapa matríkula, atu buka tuir no eduka ho fó kontribuisaun osan ba Estadu liuhosi selu koima,” reforsa resposável ne’e.

Nia subliña, hafoin aplika estratejia foun ne’e, komesa aplika regra estrada hanesan sumaflo no viola sentidu úniku.

“Maski iha momentu ne’e Polísia laiha, maibé ita grava tiha no ita buka tuir to’o momentu ida Polísia hetan bele halo apreensaun,” nia realsa.

Aleinde ne’e, eis Komandante Unidade Patrullamentu Fronteira (UPF) ne’e mós informa ba Xefe Governu, kona-ba ninia esperénsia bainhira akompaña movimentasaun no merkadoria ilegál atu ba oin bele hadi’a no hametin liután seguransa iha parte fronteira terrestre

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here