Diretóra Ezekutiva JSMP, Ana Paula Marçal. Imajen Tatoli/Egas Cristovão

DILI, 25 agostu 2020 (TATOLI)-Diretora Ezekutiva Programa Monitorizasaun Sistema Judisiál (JSMP-sigla ingles), Ana Paula  Marçal, hateten, lei Medida Prevensaun no Kombate Korrupsaun (MPCC-sigla portugés) sei  fó forsa liután ba Komisaun Anti-Korrupsaun (CAC) hodi halo prevensaun no kombate korrupsaun iha Timor-Leste.

Notísia Relevante : Prezidente Repúblika promulga lei MPKK

“Tinan barak ita hein lei ne’e no horiseik Prezidente Repúblika, Francisco Guterres ‘Lu-Olo’ halo ona promulgasaun. Ida-ne’e hatudu progresu boot ba iha ita nia rain atu kombate korrupsaun,” hateten Diretora JSMP, Ana Paula Marçal, ba jornalista sira,  ohin, iha Palaçio do Governo, Dili.

Nia hateten, ba medida prevensaun hanesan iha lei MPKK kona-ba deklarasaun riku-soin parte ida nu’udar prevensaun, atu nune’e, ema labele komete hahalok ne’ebé iha indikasaun (indísiu) ba korrupsaun ne’e rasik antes ba medida represivu sira.

Ana Paula hateten, CAC presiza servisu hamutuk nafatin ho entidade relevante hanesan Ministériu Públiku (MP), Provedoria Direitu Umanu no Justisa (PDHJ), Polísia Sientífika Investigasaun Kriminál (PCIC), sosiedade sivíl, mídia no sira seluk tan hodi promove ba kombate korrupsaun.

Diretora Ana Paula husu Governu  ho  Parlamentu Nasionál presiza fó apoiu liuhusi orsamentu jerál Estadu   ho másimu ba iha CAC, nune’e bele investe ba ekipamentu, rekursu umanu atu ejerse sira-nia funsaun tuir lei.

Jornalista       : Nelson de Sousa

Editór             : Francisco Simões

HAKEREK NO HATÁN

Please enter your comment!
Please enter your name here