Igreja Katólika kontinua apela oinsá sosiedade Timor-Leste atu kuidadu no labele soe bebé. Meius sosializasaun Igreja nian ne'e monta espanduk iha edifísiu Komisaun Justisa no Pás, Igreja Katedrál Dili. Imajen/Eugénio Pereira

DILI, 25 agostu 2020 (TATOLI)-Diretóra Interina Fundasaun Alola, Maria Imaculada Guterres, hateten joven sira tenki kontribui atu kombate ba kazu abortu ka so’e bebé iha Timor-Leste, tanba joven mak ai-rin ba futuru nasaun nian.

“Ita haree katak joven no estudante sira maka dala barak sai hanesan autór ba kazu infantesida ne’e rasik,” dehan nia durante semináriu ho tema “Konsesializa mentalidade foinsa’e sira nu’udár ajente transformadór no kontrolu sosiál kombate kazu infantesida iha Timor Leste, ne’ebé organiza husi Fundasaun Alola, tersa (25/08).

Notísia Relevante :Governu presiza apoiu ONG ba kombate kazu so’e bebé

Atu prevene no kombate hahalok ne’e, nia dehan joven sira maka tenki iha konsiénsia rasik atu evita aan husi ransu livre no problema sosiál seluk tan.

Nia hateten, joven tenke forte, sai ajente ba mudansa, transformadór no sai ema ne’ebé bele kontrolu ba problema sosiál katak nia bele hatene oinsá jere ninia aan rasik.

“Agora daudaun ita hatene katak ita-nia sosiedade ne’e livre loos iha komunidade, eskola dala barak ita haree livre loos asesu ba internet sira, maibé loloos ita rasik deside no joven sira tenke iha maturidade atu uza teknolójia sira ne’e ho di’ak, tanba bainhira ita uza sala ita estraga ita-nia futuru,” katak nia iha Fundasaun Alola Dili.

Diretóra Interina Fundasaun Alola ne’e, apela ba foinsa’e sira atu aprende siénsia barak liután hodi hasa’e abilidade no koñesimentu pesoál para labele depende de’it ba lisaun ne’ebé maka profesór sira hanorin iha eskola.

Aleinde ne’e husu atu joven sira utiliza mídia sosiál liliu internet atu aprende siénsia no evita uza sala tanba sei estraga pensamentu foinsa’e sira nian.

Entretantu, tuir dadus husi Polisia Nasionál Timor-Leste (PNTL), rejista kazu so’e bebé iha Timor-Leste hahú husi 2015-2020 hamutuk kazu 49, no Fundasaun Alola asesu liuhosi mídia sosiál iha kazu hamutuk 25.

Notísia Relevante :Família Xave Importante Halakon Kazu Soe Bebé

Jornlista : Felicidade Ximenes

Editór     : Agapito dos Santos

HAKEREK NO HATÁN

Please enter your comment!
Please enter your name here