Filipe da Costa. Imajen/Egas Cristóvão

DILI, 25 agostu 2020 (TATOLI)–Koordenadór Gabinete de Apoio Sociedade Civil-Gabinete Primeiru-Ministru (GASC-GPM), Filipe da Costa, hateten tinan ida-ne’e no tinan-oin, GASC iha prioridade tolu (3) ba atividade juventude nian.

Prioridade prinsipal sira, Filipe da Costa esplika, mak setór edukasaun kona-ba ijiéne no sanitasaun iha eskola, profisionalizmu sei hetan iha terrenu bainhira prátika oinsá hala’o prevensaun ba kualkér dezastre, prioridade datoluk mak organiza-aan.

“Ohin, GASC mai atu haree oinsá CVTL organiza juventude sira hodi mai aprende matéria hodi sira bele aplika iha komunidade. Asuntu tolu konaba-edukasaun, profisionalizmu no organiza-aan ne’e importante ba GASC atu implementa iha futuru,” dehan Koordenadór GASC, Filipe da Costa, liiuhosi komunikadu bainhira hato’o diskursu iha akampamentu Cruz Vermelha Juventude, iha Aldeia Daralu, Suku Becora, Dili.

Entretantu, nia hateten, GASC sei servisu hamutuk ho organizasaun hanesan sosiedade sivíl, inklui fundasaun, asosiasaun, no grupu komunitáriu, tuir mai relijiaun sira hanesan katólika, protestante, musulmanu, no ikus liu mak organizasaun rezisténsia.

“Ba organizasaun rezisténsia, ita fó asisténsia espesiál tanba GASC no asosiasaun veteranu koopera hamutuk atu buka programa ne’ebé di’ak hodi ajuda membru sira, inklui ben-estar ekonómia no sosiál, no programa ne’ebé relasaun ho sira-nia oan, inklui edukasaun, profisionalizmu no organizasaun,” Koordenadór GASC ne’e hateten. 

Tanba ne’e, Filipe da Costa sujere ba jerente CVTL atu futuru treinamentu sira tenke inklui matéria nutrisaun ba juventude atu sira koñese kona-ba tipu ai-han nutrisaun ba forsa, kresimentu fíziku no oinsá bele prodús ai-han nutrisaun iha rai Timor-Leste.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here