Ministru Turizmu, Komérsiu no Indústria, José Lucas do Carmo da Silva, bainhira halo entrevista esklusiva ho Agência Tatoli iha ninia knaar fatin, Mandarin, tersa (25/08). Imajen Tatoli/Joanico de Araújo

DILI, 25 agostu 2020 (TATOLI)-Asosiasaun Hotelaria Timor-Leste (AHTL) no Asosiasaun Turizmu Timor-Leste (ATTL) disponível koopera ho Ministériu Turizmu Komérsiu no Indústria (MTKI) hodi dezenvolve setór turizmu iha Timor-Leste.

Ministru Turizmu Komérsiu no Indústria, José Lucas do Carmo da Silva, halo ona enkontru ho Diretór AHTL, Tony Jape inklui Diretór ATTL, José Rocha, iha tempu hanesan, hodi ko’alia kona-ba kooperasaun tanba daudaun ne’e MTKI hetan ona programa rekuperasaun ekonómika ne’ebé bele prodús inisiativa ho parseiru sira.

“Iha enkontru, ami dada-lia atu esplora idea ba asosiasaun boot rua ne’e atu fó kontribuisaun  iha área turizmu. Hosi diskusaun nota katak asosiasaun sira hatudu interese pozitivu tebes no hakarak atu hola parte iha programa rekuperasaun ekonómika,” tenik Ministru José Lucas ba Agência Tatoli, iha ninia knaar fatin, Mandarin , tersa ne’e.

Asosiasaun rua ne’e sei envolve ekipa tékniku iha enkontru ho MTKI tuirmai.

“Sira sujere iha enkontru turmai envolve asosiasaun rua dala-ida atu halo diskusaun kle’an liután iha Timor Plaza iha tempu badak. Sira hatudu interese iha ita-nia atividade atu halo área turizmu la’o normál filafali,” nia akresenta.

Nia dehan, asosisaun rua iha interese atu halo rebilitasaun pouzada sira.

“Sira mós iha interese hakarak hola parte iha reabilitasaun fatin turizmu hanesan pouzada no sira hakarak atubele utiliza espasu halo atividade negósiu,” Ministru haktuir.

Maski nune’e, asosiasaun rua preokupa ho rekursu umanu ba rekuperasaun setór turizmu.

“Agora daudauk ita-nia rai-laran iha ona kursu nível sekundária no kursu nível universitáriu kona-ba ospitalidade no otelaria, entaun saida maka ita tenke halo maka revizaun ba ita-nia kuríkulu, tanba ho kuríkulu maka atende ona ba nesesidade ka demanda merkadu,” subliña governante ne’e.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here