Asidente tráfegu entre karreta "kaixote" ida ho xapa matrikula 57937 husi Kompañia Leader Super Market soke malu ho karreta mini Pajero Estadu nian husi ANATL, E.P. ho Xapa 06-330G iha área estrada Palapasu no Bebora, Dili. Imajen/Eugénio Pereira

DILI, 25 agostu 2020 (TATOLI)- Asidente tráfegu ne’ebé akontese iha área kruzamentu estrada entre  Palapasu no área Bebora, Dili, ohin, rezulta motorista ida kanek kaman.

Asidente tráfegu entre karreta “kaixote” ida ho xapa matrikula 57937 husi Kompañia Leader Super Market soke malu ho karreta mini Pajero Estadu nian husi ANATL, E.P. ho Xapa 06-330G iha área estrada Palapasu no Bebora, Dili. Imajen/Eugénio Pereira

Asidente tráfegu ne’ebé ne’e akontese iha tuku 8:00 Otl, entre karreta “kaixote” mean ida ho xapa matrikula 57937  husi Kompañia Leader Super Market tula sasán nesesidade báziku husi Armazein Bidau liu estrada parte Tiger Fuel nia oin atu ba Comoro ba ho velosidade soke karreta estadu mini Pajero husi Administração de Aeroportu e Navigacão Aérea de Timor-Leste (ANATL, E.P.) ho Xapa 06-330G ne’ebé mai husi diresaun área Palapasu atu ba Bebora ho velosidade mós.

Iha akontesimentu ne’e rezulta karreta “kaixote” nia vidru oin nakfera no baku fila rezulta motorista ho naran Marcos ho traballadór na’in-rua  kanek kaman. Enkuantu karreta Estadu ne’e parte sorin karuk hetan estragus maka’as too  roda rebenta no la rezulta ema ruma kanek.

Asidente ne’e hamosu engarrafamentu no parte Polísia Tránzitu Dili salva kedas vítima ne’ebé kanek lori kedas ba Ospitál Nasionál Guido Valadares (HNGV).

Tuir observasaun Agência Tatoli nota katak, parte Polísia Seksaun Tránzitu, Dili, halo kedas investigasaun  ne’ebé prova  motorista karreta rua ne’e nian halai ho velosidade no rezulta soke-malu.

Unidade Seksaun Tránzitu Dili kontinua halo investigasaun no sukat fatin akontesimentu hodi foti deklarasaun husi parte rua hodi bele deskobre loloos hodi kronolojia akontesimentu ne’e.

Hafoin ida ne’e, PNTL koordena kedas ho parte Kompañia Leader too iha fatin hodi hasai mós sasán nesesidade báziku ne’ebé tula iha karreta “kaixote” laran no buka kedas apoiu hodi foti hikas karreta ne’e.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here