Koordenador Sosiedade Sivil Foun, Filipe da Costa

DILI, 25 agostu 2020 (TATOLI)–Gabinete de Apoio Sociedade Civil-Gabinete Primeiru-Ministru (GASC-GPM observa akampamentu CVTL hodi muda mentalidade juventude sira-nian atu responde risku dezastre iha komunidade nia leet.

Notísia Relevante: GASC iha prioridade tolu ba atividade juventude

Koordenadór Gabinete de Apoio Sociedade Civil-Gabinete Primeiru-Ministru (GASC-GPM), Filipe da Costa, hateten juventude sira hahú envolve-aan iha atividade voluntarizmu tanba ne’e oportunidade di’ak atu sira aprende kona-ba ijiéne pesoál, saúde públika, apoiu umanitária, responde dezastre natural no juventude ne’ebé sai dixiplina. 

“Ha’u-nia observasaun katak hanorin juventude atu sai voluntáriu ka voluntária ne’e di’ak atu hahú muda sira-nia mentalidade hodi hasoru risku boot iha futuru hanesan dezastre naturais, apoiu umanitária no sosializasaun saúde públika. Ita hahú mentaliza joven sira ba atividade ne’e, ha’u fiar katak ita no komunidade sei hetan moris di’ak tanba sempre apoiu komunidade iha kualkér tempu,” dehan Koordenadór GASC, Filipe da Costa, ba juventude sira iha akampamentu Cruz Vermelha Juventude, iha Aldeia Daralu, Suku Becora, Dili.

Entretantu, Responsavél Akampamentu CVJ iha Darlau, Alda de Araújo, hateten atividade akampamentu iha fulan hirak nia laran la envolve juventude barak mós kontribui ba protokolu saúde ne’ebé emite hosi Ministériu Saúde (MS) atu prevene surtu COVID-19 iha Timor-Leste.

“Akampamentu ba fulan agostu ita envolve voluntáriu no voluntária hamutuk ema na’in-20 husi eskola tarjetu sira, inklui juventude husi Aldeia Namalai, Suku Camea no Aldeia Darlau, Suku Becora, no mós treinadór voluntáriu/a seniór husi Cruz Vermelha Timor-Leste (CVTL),” Alda de Araújo hateten.

Responsavél ne’e haktuir, akampamentu ne’e sei hala’o durante loron-haat entre 19 no 23 agostu 2020 hodi voluntáriu/a foun sira bele aprende matéria barak liután. Matéria sira ne’e, sira sei aprende iha loron-haat nia laran hanesan programa saúde, primeiru sokorru, apoiu emerjénsia ba vítima asidente tráfiku, no jestaun dezastre hodi apoiu komunidade imediatamente bainhira akontese dezastre ruma. 

“Ita hanorin mós ba juventude voluntáriu/a kona-ba Joven Saudavel. Matéria ne’e hanorin sira oinsá foti desizaun, komunikasaun no aprende atu evita moras hada’et sira no sirkulasaun droga ne’ebé posivél estraga futuru juventude nian. Durante loron-haat, ekipa seniór CVTL hanorin sira kona-ba maneira, dixiplina individuál atu kumpre regra, oráriu no poupa bee, nune’e sira bele ajusta sira nia-aan bainhira responde situasaun emerjénsia ruma,” nia dehan. 

Nia dehan, CVTL mós konvida ona pesoál saúde atu hanorin prevensaun COVID-19, nune’e ita sei hala’o sensibilizasaun ba komunidade hodi evita hada’et moras ne’e iha nivel komunidade. Liu tiha teória, sira mós sei envolve autoridade lokál no komunidade atu hala’o simulasaun boot ida kona-ba responde dezastre natural tantu iha tempu udan ka bailoron.

Entretatu, voluntária Monica Soares hateten sira aprende kona-ba enkuadramentu atu sai voluntáriu ka voluntária no oinsá nia rekrutamentu sira, saúde reprodutiva, no responde situasaun emerjénsia durante loron-haat treinamentu iha akampamentu CVJ, Aldeia Darlau.

“Akampamentu sempre dook husi sidade atu ha’u bele kalma hodi simu matéria didi’ak. Liutiha hala’o simulasaun kona-ba dezastre, apoiu umanitária no sosializa prevene surtu Corona Virus (VOVID-19) direita iha komunidade,” nia dehan. 

Monica rekoñese akampamentu juventude ba futuru akumulativu mak atu halibur joven sira hodi aprende no implementa matenek ne’ebé simu hosi ekipa treinadór CVTL iha sira-nia komunidade rasik.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here