Ministériu Asuntu Parlamentár no Komunikasaun Sosiál, Francisco Jerónimo, hamutuk ho ekipa halo diskusaun kona-ba programa prioridade ministériu, iha Gabinete MAPKOMS, Palásiu Governu. Imajen/MAPKOMS

DILI, 25 agostu 2020 (TATOLI)-Iha tinan fiskál 2021, Ministériu Asuntu Parlamentár no Komunikasaun Sosiál (MAPKOMS) sei implementa programa prinsipál lima hanesan asuntu parlamentár no koordenasaun entre Governu no Parlamentu Nasionál (PN), boa governasaun no jestaun institusionál, diseminasaun informasaun ba asaun governativa no programa dezenvolvimentu, garante liberdade espresaun no asesu ba informasaun inklui enkoraja diversidade meiu komunikasaun sosiál.

“Programa ligadu ho asuntu parlamentár, MAPKOMS sei konsentra iha atividade koordenasaun ho bankada parlamentár sira no konferénsia líder bankada iha Parlamentu, inklui halo koordenasaun ho komisaun espesializada no akompaña másimu sesaun plenáriu,” refere nota ne’ebé Agência Tatoli asesu, tersa ne’e.

Nune’e mós, sei reforsa serbisu komunikasaun sosiál iha PN, organiza programa talk show rádiu iha Metro FM ligadu ho asuntu sira Parlamentár no dezenvolve mekanizmu kooperasaun ho PN atu estabelese Televizaun Parlamentár.

Ba programa boa governasaun no jestaun institusionál, MAPKOMS sei konsentra iha atividade atu define kuadru jurídiku relasiona ho funsionamentu instituisaun no hametin instituisaun liuhosi hasa’e kapasidade rekursu umanu MAPKOMS nian asegura halo jestaun di’ak iha aspetu finanseira, administrasaun, lojístika no aprovizionamentu no iha tempu hanesan iha kapasidade atu halo planeamentu, monitorizasaun no avaliasaun.

Enkuantu, iha programa diseminasaun informasaun, sei konsentra iha atividade disemina informasaun hotu relasiona ho asaun governativa hosi VIII Governu Konstitusionál no sei uza másimu meiu komunikasaun sosiál hotu ne’ebé eziste ho plataforma dijitál oioin ne’ebé iha, atu fasilita di’ak liután transmite no sirkula ba públiku iha territóriu nasionál, rejionál no internasionál.

Aleinde ne’e, sei masimiza servisu produsaun audiovizuál hodi aumentu produsaun pakote informativu ho formatu televiziva no rádiu.

“Iha programa ne’e, MAPKOMS sei buka mekanizmu kooperasaun ho órgaun komunikasaun sosiál privadu sira hodi asegura povu nia diretu asesu ba informasaun sira kona-ba prosesu no progresu dezenvolvimentu,” refere nota imprensa ne’e.

Kona-ba programa garante liberdade espresaun no asesu ba informasaun, sei kontinua apoiu sira ba Ajénsia Notisioza Timor-Leste, Institutu Públiku (Tatoli,IP), ho ninia atividade prinsipál sira hanesan reforsa funsionamentu instituisaun, garante fasilidade no ekipamentu serbisu adekuadu no modernu, reforsa serbisu redasaun ba espansaun konteúdu no asegura kualidade iha publikasaun notísia no reforsa parseria ho mídia nasionál no ajénsia notisioza internasionál sira.

Aleinde ne’e, MAPKOMS sei fó atensaun másimu mós ba apoiu promosaun no konsolidasaun papél Rádiu Televizaun Timor-Leste, Empreza Públiku (RTTL.EP), liuhosi atividade hanesan apoia kriasaun planu estratéjiku no planu negósiu RTTL inklui investe iha infraestrutura (edifísiu no torre sira).

La haluha mós, sei fó apoiu nafatin Konsellu Imprensa nu’udár órgaun independente reguladór ba setór komunikasaun sosiál no atividade elabora legizlasaun nesesária iha área komunikasaun sosiál nian.

“Entre sira ne’e ida mak Lei Radiodifuzaun, alterasaun ba lei komunikasaun sosiál no seluk tan,” nota ne’e subliña.

MAPKOMS konsidera, estabelese institutu formasaun ba jornalista mós hola parte iha programa garante liberdade espresaun no asesu ba informasaun.

“Iha atividade ne’e, MAPKOMS sei kolabora ho Konsellu Imprensa, organizasaun jornalista, no instituisaun akadémika iha rai-laran no parseiru internasionál sira hodi buka forma di’ak liu ba harii futuru Instituisaun Formasaun Jornalista Timor-Leste nian,” nota ne’e esplika.

Nune’e mós, formasaun téknika komunikasaun mós sai prioridade iha programa ne’e no formasaun ninia benefisiáriu distina ba ofisiál relasaun públiku no komunikasaun sosiál iha Governu nian laran.

Programa ikus maka enkorajamentu diversidade meiu komunikasaun sosiál, ne’ebé sei konsentra iha promosaun no dezenvolvimentu mídia lokál sira, kontinua fó apoiu ba estasaun rádiu komunidade sira ne’ebé eziste no harii tan estasaun rádiu komunidade foun.

“Aleinde ne’e sei implementa mós programa Naroman ba Suku no atividade importante seluk iha programa ne’e, MAPKOMS sei servisu hamutuk ho organizasaun jornalista, asosiasaun ema ho defisiente sira no organizasaun feto sira,” nota ne’e dehan.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here