Doutór Rui Maria de Araújo

REINU UNIDU, 21 agostu 2020 (TATOLI)—Komunidade Timoroan iha Reinu Unidu liuhosi Xefe Komunidade Timoroan iha Peterborough, foin lalais ne’e, organiza Zoom Meeting ho tema “Efeitu hosi COVID-19 ba Komunidade Timoroan iha Reinu Unidu, Oinsá Transmisaun iha Komunidade Nia Leet no Oinsá Medida Preventivu” ne’ebé hala’o iha Peterborough, Reinu Unidu.

Eis Primieru Ministru, Rui Maria Araújo, husu ba timoroan sira iha Reinu Unidu atu hatoman-aan ho norma foun sira iha moris loro-loron nian hanesan uza máskara, distánsia sosiál, no fase liman regularmente atu nune’e hamenus hada’et transmisaun COVID-19 iha komunidade timoroan nia leet no mós tenke prepara-aan ba COVID-19 laloran daruak (second waves) nian.

 “Ha’u hakarak fó pontu rua ne’ebé importante tebe-tebes ba maluk timoroan sira iha Reinu Unidu. Primeiru, atu hatoman-aan ho norma foun iha moris hanesan fase liman bei-beik ho sabaun tanba tendénsia boot liu transmisaun virus ne’e sempre hosi liman, halo distánsia sosiál no uza máskara. Máskara ne’e hanesan bareira ida pelumenus nia taka ibun no inus. Iha fatin balun tanba razaun seguransa ema uza máskara ho face shield ne’ebé proteje hosi matan, inus no ibun.  Labele hakuak malu. Labele kaer liman. Mantein distánsia sosiál no seluk tan. To’o agora vasina seidauk iha, entaun ita-nia arma atu hasoru pandemia COVID-19 ne’e mak disiplina ita-nia aan,” dehan Rui Maria Araújo liuhosi Zoom Meeting, foin lalais ne’e.

Pontu daruak, Rui Araújo haktuir, enkuantu seidauk iha vasina ida maibé posibilidade atu tama ba second wave (laloran daruak) ne’e boot iha Reinu Unidu makaas tebe-tebes tanba atu tama ona ba invernu. Tanba ne’e, nia apela ba maluk timoroan sira iha Reinu Unidu atu halo prevensaun individual liuliu nível família no komunidade, tanba ne’e ema hotu-hotu tenke assume responsabilidade hamutuk.

Rui Araújo informa, moras ida-ne’e hadaet hosi kabeen-tasak tama mai hosi ema-nia isin liuhosi ibun, inus no matan. Tanba, tuir nia, ema ne’ebé mak pozitivu bainhira nia me’ar ka fani, husik hela virus ne’e tuur hela iha supervisiu (ai, metal, etc) nia leten. Tamba ne’e mak medida prevensaun hanesan fase liman beibeik ne’e importante tebe-tebes atu nune virus ne’e labele tama ba ema-nia isin.

“Tanba moras COVID-19 ne’e depende mós ba ita ema ninia imunidade. Grupu vulneravel sira liuliu ferik katuas sira hetan moras kronika hanesan diabetes, asma, tensaun alta, no mós grupu labarik kiik sira maka risku boot liu. Bainhira ita-nia imunidade di’ak hanesan nutrisaun di’ak, deskansa di’ak, ezersísiu di’ak, entaun ita-nia isin bele responde ba virus ne’e. Normalmente, ita ne’ebé iha moras kronika bainhira hetan ona virus ne’e, entaun ita komesa dada-iis moras ka susar. Ida-ne’e la’ós deit presiza self isolation maibé presiza ona atensaun hospitalizar,” Rui esplika.

Moras COVID-19 ne’e. Rui Araújo hateten, iha kategoria rua kona-ba virus ne’e hada’et ba ema-nia isin. Ida, nia dehan, bele iha ema hatudu síntoma no ida seluk bele iha kazu ema ne’ebé laiha síntoma.

Tanbasá mak tenke self isolation ka karantina semana rua, nia esplika, tanba iha períodu inkubasaun, virus ne’e lori loron 0-14 atu provoka síntoma (kakorok moras, me’ar beibeik, tolan kabeen moras no isin manas). Maibe, nia dehan, iha ema balun mezmu virus ne’e iha ona nia isin maibé iha períodu inkubasaun ne’e, nia la hatudu síntoma ne’ebé ema bolu asintomatikus.

“Kategoria ema asintomatikus ne’e maka bele hada’et moras ka virus ne’e ba ema seluk tanba nia laiha sítoma entaun nia la halo karantina. Tanba ne’e, importante atu halo teste,” nia haktuir.

Infelizmente, nia dehan, kazu iha Reinu Unidu diferensa ho kazu iha Timor tanba iha Timor maioria kazu asintomatikus no importadu, signifika ema tama Timor halo kedas karantina no se deteta pozitivu entaun Estadu tau kedas iha fatin izolamentu hodi Estadu mak toma konta no se negative entaun bele reintegra ba komunidade.

Iha biban ne’e, nia hateten, iha Reinu Unidu infelizmente bolu ona transmisaun iha komunidade ne’ebé signifika virus ne’e hada’et ona hosi komunidade ida ba komunidade sira seluk, ne’eduni medida prevensaun ne’e importante tebe-tebes. Ema ne’ebé pozitivu tenke asume responsabilidadi hodi halo duni karantina, atu nune’e virus ne’e labele da’et fali ba ema seluk, satán iha família ka komunidade ne’e iha ema ne’ebé kategoria vulneravel

Entretantu, Presidente Assosiasaun Timor Peterborough, Celso Oliveira, hodi komunidade timoroan iha Peterborough nia naran hato’o agradese ba Rui Maria Araújo ninia disponibildade tempu no matenek hodi hafahe informasaun kle’an kona-ba pandemia COVID-19 ba Timoroan sira iha Reinu Unidu, no mós fó obrigadu ba partisipante sira ne’ebé partisipa iha Zoom Meeting ida-ne’e, atu bele partilla informasaun sira-ne’e ba  komunidade timoroan sira seluk iha Reinu Unidu.

Iha biban hanesan, Reprezentante Embaixada RDTL iha London, Felizarda de Deus, apresia ho inisitiva ida-ne’e no hato’o obrigadu ba Xefe Associação Komunidade Timoroan iha Peterborough ne’ebé iha insiativa diak hodi kria Zoom Meeting ba Komunidade sira no Embaixada, no konvida Doutor Rui Araújo hodi partilla informasaun kona-ba Moras COVID-19 ho Lian Tetum ba maluk timoroan sira iha Reinu Unidu.

Partisipa iha Zoom Meeting ne’e, reprezentante embaixada RDTL London Felizarda de Deus, Xefi Komunidade Timoroan iha Irlanda do Norte Feliz Costa, Xefi Komunidade Timoroan iha Bristol Mocha Ribeiro, reprezentante Komunidadi Timoroan iha Cambridge Vana Fernandes no mós Timoroan hosi London (Gertrudes L Araujo), Northwich (Jose Cristovão), Oxford (Denis Santos), Irthlingborough (Nando Ike) no Peterborough (Clara Jeronimo).

Kontribuidór: Celso Oliveira

Editór: Cancio Ximenes

HAKEREK NO HATÁN

Please enter your comment!
Please enter your name here