Atividade Petrolífera iha Kampu Bayu-Undan. Imajen/Conocophillips

DILI, 24 agostu 2020 (TATOLI)-Diretór Esplorasaun no Promosaun Autoridade Nasionál Petróleu no Minerál (ANPM), Mateus da  Costa, informa hafoin kampu Kitan suspende no ninia produsaun temporáriamente desmantela iha dezembru 2015, hosi tempu ne’e kedan to’o agora Timor-Leste iha de’it kampu Bayu-undan mak kontinua halo produsaun.

Maski nune’e, produsaun  mina no gás la’o nafatin ho  ninia taxa (rates) produsaun líkidu kada loron baríl 18.000 to’o 20,000 no produsaun gás kada loron ho montante 500 to’o 750 millaun kúbiku kada loron (mmscf, sigla inglés) ho esporta kada loron gás entre 300 to’o 550 mmscf.

“Maski taxa produsaun iha kampu Bayu-undan tun daudaun, maibé ANPM hamutuk ho empreza Santos iha hela faze diskusaun tékniku detallada kona-ba posibilidade atu halo tan perfurasaun faze datoluk nian (Bayu 3C infill well drillings), ho objetivu atu mellora, hasa’e ka pelumenus mantein kapasidade produsaun ninian,” tenik Diretór ne’e ba Agência Tatoli, liuhosi  email, segunda ne’e.

Notísia Relevante: ANPM sei analiza aspetu komersiál no tékniku ba proposta Santos

Projesaun no diskusaun entre parte rua ne’e la’o ho di’ak no ezekusaun ba perfurasaun faze ne’e sei ezekuta iha meadu  tinan 2021.

Maski nia rekoñese iha situasaun globál COVID-19 mós afeta tebes ba atividade operasaun petrolífera tanba kustu restrisaun ba movimentasaun ema no ekipamentu, inklui sasán hosi rai-li’ur barak inklui Timor-Leste.

Kona-ba mina-matan foun, Diretór ne’e esplika daudaun ne’e tuir termu kontratu ne’ebé iha hosi bloku kontratu ne’e sei iha bloku perfurasaun haat maka sei faze peskiza no ninia durasaun ba tinan rua to’o tolu nia-laran.

Kompañia konsórsiu lima halo atividade mina-gás iha Tasi Timór

 Diretór Mateus da  Costa, dehan daudaun ne’e  kompañia lima mak halo atividade mina no gás iha bloku hitu iha Tasi Timór

“Daudaun ita iha bloku peskiza no prospesaun hitu, no iha kompañia konsórsiu lima ne’ebé halo hela operasaun atividade petróleu peskiza no prospesaun ba bloku neen hosi bloku hitu ne’e rasik,”

Diretór ne’e informa, grupu kompañia lima ne’e  maihosi nasaun Austrália, Portugál, Japaun, Korea, Inglatera, no Itália, inklui mós empreza estatál Timor-Leste, Timor GAP hanesan membru hosi grupu parseria ne’e.

Timor GAP halo atividade petrolífera iha tasi laran (offshore), iha bloku peskiza no prospesaun hanaran TL-SO-15-01.

Produsaun iha kampu Bayu-undan iha bloku hitu, kompostu hosi bloku rua hanesan TL-SO-T19-12 no TL-SO-T19-13 ne’ebé daudaun ne’e hala’o produsaun hela.

Iha kampu Bayu-undan, opera hosi empreza australiana, Santos Limite, hafoin halo akizisaun interese iha Bayu-undan no Darwin LNG hosi kompañia ConocoPhillips.

Bloku iha kampu Bayu-undan, iha parseiru kompañia hosi Japaun no Itália ninian.

Enkuantu bloku TL-SO-T19-10 iha kampu petrolífera Kitan, ninia produsaun suspende ona iha tinan 2015 tanba folin mina monu no temporáriamente desmantela, maibé agora daudaun iha hela faze desmantela permanente.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here