Xanana Gusmão hakne’ak hodi simu oferta tais ne’ebé tara husi Tirja Xavier iha Aldeia Lesu, Postu Administrativu Hatudu, Ainaro, domingu (07/06/2020). Imajen/Dok. Tatoli

DILI, 24 agostu 2020 (TATOLI)- Primeiru-Ministru, Taur Matan Ruak, hato’o apresiasaun boot ba esforsu no servisu umanidade lider karizmátiku, Kay Rala Xanana Gusmão nian, ne’ebé kontinua tun ba komunidade iha liña fronteira terrestre hodi halo sensibilizasaun kona-ba prevensaun surtu Coronavirus ka COVID-19.

Notísia Relevante : Posibilidade, extende tan estadu emerjénsia

Komandante ein-Xefe FALINTIL, Kay Rala Xanana Gusmão, hala’o asaun solidariedade iha territóriu nasionál, liuliu iha liña fronteira terrestre Bobonaro, Covalima, Rejiaun Administrativu Oe-Cusse no Ambeno (RAEOA) ho Postu Administrativu Atauro, Munisípiu Dili, hodi ajuda kbiit-laek sira no aproveita halo mós sosializasaun ba regra sira prevensaun COVID-19.

Brigadeiru Jenerál João Miranda “Aluc Descartes”. Imajen/Dok. Tatoli

Diretór Sentru Integradu ba Jestaun Krize, Brigadeiru Jenerál João Miranda ‘Aluc Descartes’ deklara misaun COVID-19 ne’ebé Xanana halo ajuda tebes Governu Timor-Leste, hodi kontribui ativu ba luta foun kontra propagasaun peste letál  COVID-19.

“Ha’u fiar katak, maun Xanana nia preokupasaun la’ós buat seluk no buat leet, maibé  preokupasaun maka luta hasoru COVID-19, no Governu mós louva kona-ba servisu ne’ebé maun Xanana halo luta hasoru COVID-19 hodi sosializa direita informasaun ba povu sira,” hateten Brigadeiru Jenerál João Miranda ‘Aluc Descartes’ ba jornalista, hafoin enkontru ho Primeiru-Ministru, Taur Matan Ruak, ohin, iha Palaçio do Governo, Dili.

Aluc dehan, Governu agradese tebes esforsu grupu organizasaun no Timor-oan sira ne’ebé koopera ho Governu hodi sosializa informasaun no fahe apoiu máskara no ekipamentu saúde nian ba populasaun no estudante Timor-oan iha Timor-Leste.

“Instituisaun Estadu apresia ba esforsu hotu- hotu ne’ebé estadu halo no indivíduu sira halo, tanba ita hotu nia preokupasaun, oinsá mak ita atu evita moras ida ne’e mai da’et ita nia emar sira,” Aluc hateten.

Kay Rala Xanana Gusmão daudaun ne’e halo hela vizita ba Oe-Cusse hodi fó apoiu ai-han ba kbiit-laek sira, inklui sosializa regra prevensaun COVID-19 no husu atensaun ba povu atu kuidadu halo movimentu ba mai iha liña fronteira entre Timor-Leste no Indonézia hodi evita propagasaun COVID-19.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here