Seremónia Arsebispu hosi Arkedioseze Metropolitana Dili, Don Virgílio do Carmo da Silva simu Páliu hosi CET, iha misa domingu (23/08), iha Katedrál Nossa Senhora Imaculada Conceição. Imajen/PR

DILI, 24 agostu 2020 (TATOLI)-Arsebispu hosi Arkidioseze Metropolitana Dili, Don Virgílio do Carmo da Silva, simu Páliu hosi Santa Sé, ne’ebé atribui liuhosi Prezidente Conferência Episcopal Timorense (CET), Dom Norberto Amaral, iha ámbitu selebrasaun misa domingu (23/08) iha Katedrál Nossa Senhora Imaculada Conceição, Dili.

Primeiru-Ministru, Taur Matan Ruak, hato’o votu parabéns ba Dom Virgílio.

“Hodi VIII Governu Konstitusionál nia-naran no ha’u-nia naran rasik, hakarak hato’o votu parbéns ba Amu Dom Virgílio do Carmo da Silva SDB, hanesan Arsebispu Arkidioseze Metropolitana Dili nian, ne’ebé horseik simu Páliu hosi Santa Sé. Infelizmente ha’u labele partisipa iha serimónia tanba kondisaun saúde, maibé nafatin manifesta ha’u-nia votu susesu,” refere nota imprensa ne’ebé Agência Tatoli asesu iha segunda ne’e.

Arsebispu hosi Arkidioseze Metropolitana Dili, Don Virgílio do Carmo da Silva, hamutuk ho Primeiru-Ministru, Taur Matan Ruak. Imajen/GPM

Símbolu Páliu ka kanopi ne’e, indika komunãun Arsebispu ho Pontífise ho Tronu Pedro, ne’ebé hafoin atribuisaun kanopi, rai iha rate São Pedro iha altár konfisaun iha Basilika São Pedro Roma to’o iha solenidade São Pedro no São Paulo maka foin entrega hosi Papa ba Arsebispu sira.

Iha kazu Arsebispu ne’ebé atu simu Páliu la hola parte iha selebrasaun ne’e, nia Páliu kontinua rai hela iha rate São Pedro to’o entrega ba nain.

Kanopi maihosi lian latín (pallium,manto), halo hosi kabas bibi malae nia kulit ne’ebé hetan bensaun hosi Papa iha memória litúrjika Santa Inés nian, kompostu hosi kabas bibi malae tahan rua ne’ebé hafutar ho kruz kór metan.

Arsebispu sira uza iha sira-nia kabás ho fita tara, tun iha sira-nia peitu no fita seluk iha kabás kotuk, nu’udar símbolu Arsebispu hanesan Bibi Atan ida.

Páliu. Imajen/GPM

Insígniasaun Páliu ne’e, hatudu Arsebispu ninia autoridade kona-ba Arkidioseze, ne’ebé hanesan bispu iha sidade importante no metropolitana, atu tau-matan mós ba dioseze viziñu sira iha kazu vakánsia (mate ka renúnsia hosi bispu).

Tanba ne’e, Arsebispu bele uza Páliu ne’e iha selebrasaun hotu ne’ebé nia prezide ka konselebra iha Arkidioseze, nune’e mós iha dioseze sufragánea.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here