Deputadu CNRT, José Virgílio, baku-fila Meza Prezidente Parlamentu Nasionál (PPN). Imajen Tatoli/António Gonçalves.

DILI, 24 agostu 2020 (TATOLI)—Parlamentu Nasionál liuhosi reuniaun lider bandaka parlamerntár deside ona data fiksu ba serimónia hatuur hikas meza prezidénsia Parlamenru Nasionál ne’ebé deputadi CNRT baku-fila ka harahun iha loron 19 maiu 2020 ne’e, iha loron 04 fulan setembru tinan ida-ne’e.  

Notísia Relevante: Serimónia hatuur-hikas meza prezidénsia PN sei realiza iha 4 setembru

Pontu Vogál Sekretáriu Estadu Arte no Kultura (SEAK), Eugénio Sarmento, hateten objetivu hatuur meza Prezidénsia ne’e kulturamente atu haketak tiha todan ne’ebé mak akontese tiha ona iha Parlamentu Nasionál hodi hatuur hikas fali meza lideransa nasionál ho dignu no haloos fali reprezentante povu sira-nia knaar ho loloos no responsabilidade.

Lia-na’in Eugénio Sarmento. Imajen Tatoli/Osória Marques.

“Objetivu hatuur meza Prezidénsia ne’e atu haketak tiha todan ne’ebé mak akontese tiha ona iha Parlamentu Nasionál hodi hatuur hikas fali meza lideransa nasionál ho dignu. Serimónia ne’e husu matak malarin ba bei’ala no erói sira, atu nune’e haloos fali povu nia reprezenta sira-nia knaar loloos ho dame, hamtauk malu no tane ho lialoos no responsabilidade,” dehan Pontu Vogál hosi Sekretáriu Estadu Arte no Kultura (SEAK), Eugénio Sarmento ba Agência TATOLI, iha nia knaar fatin Avenida Portugal (anterior Praia dos Coqueiros), Dili, segunda ne’e.

Nia hautan, serimónia hatuur hikas meza Prezidénsia PN sei akontese iha loron 04 setembru ne’e, sei akompaña ho ritual hamulak ne’ebé sei reprezenta lia-na’in sira hosi munisípiu.

Maneira atu hatuur hikas meza prezidénsia ne’e, nia dehan, sei hein lia-na’in sira hosi munisípiu mai mak foin tuur hamutuk no deside, hodi haree ba sekuénsia serimónia no hamulak ne’e la’o oinsá.

“Ita hein de’it, loron 02-03 setembru, lia-na’in sira hosi munisípiu halibur hamutuk mak deside maneira hatuur meza prezidénsia PN ne’e ho nia sekuénsia no hamulak nian ne’e oinsá,” Eugénio Sarmento hateten.

Lia-na’in ne’e mós haktuir, serimóinia halo simples de’it tanba ne’e lia-na’in sira mai ho nia reprezentante hanesan parte lorosa’e ema na’in rua (2), rai-klaran ema na’in (2), loromonu ema na’in rua (2) no hosi Dili rasik mak ema na’in tolu (3) hanesan lia-na’in hosi Carceto Motain, Bidau Manu Mata no Lacoto Rumbia.

Maibé, nia esplika, nia parte ladún hatene reprezentante lia-na’in sira ne’e tanba ida-ne’e kompeténsia Ministériu Administrasaun Estatál (MAE) nian no MAE mak halo pedidu ba administradór no Prezidente Autoridade hafoin sira eskolla lia na’in ne’ebé mak atu partisipa no akompañia serimónia rituál hatuur meza prezidénsia Parlamentu Nasionál nian.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here