Vise-Ministru Turizmu, Komérsiu no Indústria, Domingos Lopes Antunes, akompaña ho kargu xefia MTKI inklui nain ba Supermerkadu Dili Mart, David Jhon no mós Diretór Jerál Lisun, Pascoal, halo kampaña promove produtu lokál iha Covalima. Imajen/MTKI

DILI, 24 agostu 2020 (TATOLI)-Ministériu Turizmu, Komérsiu no Indústria (MTKI), foin lalais ne’e realiza kampaña promove produtu lokál ne’ebé prodús hosi grupu agrikultór sira iha Munisípiu Covalima.

Kampaña ne’e lidera diretamente hosi Vise-Ministru Turizmu Komérsiu no Indústria, Domingos Lopes Antunes, hamutuk ho kargu xefia MTKI nian, iha ámbitu komemorasaun loron Forsa Armada Libertasaun Nasionál Timor-Leste (FALINTIL) ba dala-45.

Liuhosi nota impresa ne’ebé Agência Tatoli asesu iha segunda ne’e, Vise-Ministru Domingos Lopes relata katak objetivu kampaña ne’e hodi fó tulun ba agrikultór no produtór sira bele fó kontribuisaun ba aumentu produtu internu brutu (PIB) per-kapita no mós reseita Estadu, nune’e bele aselera dezenvolvimentu ekonomia hosi área rurál ba merkadu nasionál.

Nota ne’e haktuir katak, iha kampaña ne’e hola parte hosi komersiante no distributór lokál balun hanesan kompaña Dili Mart no Lisun, hodi akompaña programa.

Iha okaziaun programa kampaña dahuluk ho tema “Hadomi no Konsumu Produtu Timór”, Vise-Ministru introdúz produtu balun hosi grupu agrikultór sira hanesan pateka, batar Sorgum no mós kafé ba konsumidór lokál, distributór no fornesedór lokál sira.

Kampaña dahuluk ne’e hetan resposta pozitivu hosi fornesedór lokál sira hanesan Dili Mart ho Lisun, ne’ebé maka disponível sosa produtu lokál no mós selebra kontratu ho grupu agrikultór sira.

MTKI apresia disponibilidade fornesedór

Ho disponibilidade fornesedór sira, Governu liuhosi MTKI konsidera hanesan pasu pozitivu ba grupu agrikultór sira ba merkadu iha futuru, nune’e bele mantein no haburas liu tan modelu fornesimentu korrente ne’e.

“Nu’udar Vise-Ministru Turizmu, Komérsiu no Indústria, sente kontente no agradese ba asaun konkretu ne’ebé hatudu hosi empreza Dili Mart no Lisun,” nia apresia.

Governante ne’e nota iha diskursu Prezidente Repúblika, Francisco Guterres ‘Lú Olo’, iha ámbitu komemorasaun loron restaurasaun independénsia iha 20 maiu liubá, kona-ba insentiva produtu lokál ki’ik, mediu no boot sira atu hasa’e liután produtividade, atu nune’e bele hamenus importasaun ai-han husi rai-li’ur.

Tanba ne’e, nia enkoraja grupu agrikultór sira atu kontinua badinas nafatin hasa’e produsaun no kestaun ne’e Governu liuhosi MTKI kontinua fó apoiu ba grupu agrikultór sira no empreza produtór sira-nia esforsu ne’ebé maka prodús ona produtu lokál balun no sei hadi’a liután programa kampaña ne’e hodi promove produtu ne’ebé prodús hosi agrikultór no produtór sira.

MTKI husu ba timor-oan hadomi konsumu produtu lokál

Governante ne’e husu ba konsumidór timor-oan sira atu iha responsabilidade morál no devér, hadomi konsumu produtu lokál, tanba ho nune’e maka foin manán soberania totál ba ai-han inklui  konsumu nasionál.

Enkuantu empreza Dili Mart no Lisun husu ba grupu agrikultór sira, atu iha devér mantein produtu ninia kuantidade no kualidade.

Husu mós atu agrikultór sira bele respeita tempu bainhira fornese produtu ba armajen kompradór sira.

Gabinete Vise-Ministru Komérsiu no Indústria hamutuk ho kargu xefia sira, durante ne’e hafoin simu knaar, halo esforsu atu eleva papél ministériu ninian no halo ona diskusaun internál ministériu ne’ebé foka liu ba setór komérsiu no indústria, bazeia ba Lei Orgánika VIII Governu, hodi prepara programa balun mak bele halo no responde iha kurtu no médiu prazu, hodi mellora setór komérsiu no indústria ida resilente no sustentável iha períodu surt COVID-19.

Nune’e mós, halo esforsu hodi pro-aktivu iha koordenasaun no halo komunikasaun ho instituisaun públiku inklui setór privadu sira, ho esperansa bele atinje meta hosi programa iha kurtu prazu nia-laran.

Pontu hosi programa balun ne’ebé maka diskute ona iha internál ministériu mak atu haree ba sistema fasilidade komérsiu, hodi introdúz produtu lokál sira ba merkadu nasionál hodi substitui produtu importasaun balun iha futuru.

“Dadaun ne’e iha hela faze preparasaun ne’ebé mak haree liu ba kadeia valór produtu lokál no mós kadeia abastesimentu, hodi halo análiza kle’an liután ba produtu identifikadu, ho dadus no mós informasaun hosi estudu ne’ebé mak MTKI hala’o ona iha fulan hirak liubá,” refere nota ne’e.

Iha futuru sei haree ba kuadru regulamentária ruma maka bele fó tulun ba implementasaun programa hirak ne’e.

Governu liuhosi MTKI iha espetativa katak, ba futuru sei fasilita di’ak liután aktividade troka komérsiu (Trading) ho di’ak, hodi dezenvolve di’ak liután kadeia valór produtu lokál atubele kria rendimentu no empregu sustentável no aproveita promove kooperativa no grupu agrikultór sira ka produtór ho kompradór sira, iha tempu hanesan bele kria no mantein kadeia abastesimentu.

  Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here