Selebrasaun entre parte tolu, akompaña hosi Ministru Asuntu Ekonómiku, Joaquim Amaral, iha salaun IADE, Bebora, segunda (24/08). Imajen/Natalino Costs

DILI, 24 agostu (TATOLI)-Institutu Apoiu Dezenvolvimentu Emprezariál (IADE) selebra akordu ho Servisu Rejistu Verifikasaun Emprezariál (SERVE) ba renovasaun kooperasaun servisu rejistasaun empreza lokál iha territóriu laran tomak inklui arrendamentu no Fundasaun Fini Klibur (FIKLI) atu fó formasaun ba jestaun emprezariál.

“Akordu ho SERVE ho objetivu atu fasilita emprezáriu sira iha munisípiu sira bele asesu  servisu verifikasaun dadus emprezariál ka atividade negósiu hosi SERVE ho lalais no kualidade. Nune’e mós, atu fasilita formasaun emprezariál ba aréa jestaun negósiu ba membru FIKLI hodi halo ativa negósiu ho di’ak liután,” tenik Diretór Ezekutivu IADE, Filomeno Marcal Belo, hafoin selebra akordu ho parte rua iha edifísiu IADE, Bebora, segunda ne’e.

Dirijente ne’e apresia akordu ne’e, tanba akompaña direta hosi Ministru Koordenadór Asuntu Ekonómiku, Joaquim Amaral, ne’ebé IADE tutela ba.

“IADE sente orgullu tebes ho akordu ne’ebé maka akompaña direta hosi  Ministru Koordenadór Asuntu Ekonómiku, ne’ebé bele motiva funsionáriu  IADE tomak,” nia realsa.

IADE selebra ona akordu hanesan ho instituisaun seluk hanesan Banku Nasionál Komérsiu Timor-Leste  (BNCTL, sigla portugés) atu fasilita kliente IADE (ne’ebé tuir ona formasaun iha institutu ne’e) bele asesu kréditu.

Nune’e mós, halo kooperasaun ho International Labour Organization (ILO), atu halo formasaun ba kontratór sira hosi munisípiu Manatuto no Lautém.

Iha mós formasaun ba Organizasaun Naun Govermentál (ONG) TOMAK no ba projetu Ministériu Agrikultura no Peska (MAP) hodi fasilita to’os nain sira.

Iha fatin hanesan, Diretór Ezekutivu SERVE, Florêncio Sanches, hateten akordu ne’e ba dala-rua, tanba antes ne’e halo ona akordu ho IADE iha tinan 2013 atu fasilita dokumentu emprezariál sira hosi munisípiu mai iha Dili.

Diretór ne’e esplika, akordu ohin foku liu ba lojíztiku ninian, atu fasilita SERVE iha serbisu fatin, tanba estabesimentu ba SERVE iha Munisípiu Viqueque, Lautém no Manufahi ladun boot atu uza ba atendimentu públiku.

“Entaun ho kooperasaun ne’e, IADE prontu tebes atubele oferese sira-nia fatin iha munisípiu sira, maibé manutensaun ba espasu institutu ne’e SERVE maka responsabliza  rasik. Edifísiu SERVE iha munípiu tolu ladun di’ak ba atendimetu públiku,” nia akresenta.

Nune’e mós, Fundadór FIKLI, Abel Ximenes Larisina, hateten FIKLI nu’udar empreza hakarak fó kontribuisaun ativa ba dezenvolvimentu setór emprezariál nasionál atubele dezenvolve no kapasita ajente ekonómiku Timor-Leste.

“Ami hakarak emprezáriu timor-oan sai manu aman ne’ebé kokorek iha rai doben, tuir inspirasaun FALINTIL nu’udar liman kroat povu-nia ne’ebé foin daudaun ita komemora ba dala-45,” nia realsa.

Nia dehan, maski hasoru dezafíu barak, maibé iha mós oportunidade atu haree dezenvolvimentu no povu-nia moris di’ak.

“Ami kontente ho prezensa Ministru Koordenadór Asuntu Ekonómika hodi formaliza ona akordu kooperasaun IADE ho empreza FIKLI ba kapasitasaun liuhosi formasaun no akonsellamentu,” nia akresenta.

Empreza FIKLI harii iha 2009, nu’udar emprezáriu ne’ebé maka halo meza no kadeira hodi distribui ba eskola sira ho kualidade di’ak.

Ministru Koordenadór Asuntu Ekonómika, Joaquim Amaral, apresia ba akordu kooperasaun ne’ebé maka parte tolu halo ona.

“Ita kongratula no fó apresisaun ba parte IADE SERVE no empreza FIKLI rasik, tanba ho inisiativa bele inspira malu ba dezenvovimentu emprezariál  Timor-Leste ne’ebé di’ak tebes,” nia subliña.

Ministru dehan, Governu sei kontinua kria kondisaun atu nune’e emprezáriu sira ninia atividade ekonómika bele buras.

“Hanesan Ministru iha limitasaun barak tanba iha tinan rua ikus ne’e  ita iha difikuldade barak, maibé ohin ita bele asiste dala-ida tan serbisu hamutuk hanesan saida maka parte tolu ne’e halo ona,” nia akresenta.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here