Diretór Jerál Serbisu Migrasaun, Superintendente Agostinho Gomes Imajen/Dok.MI

DILI, 24 agostu 2020 (TATOLI)- Vise Ministru Interiór, António Armindo, klarifika katak, too oras ne’e nia parte seidauk bele muda Diretór Servisu Migrasaun, Superintendente Xefe Agostinho da Silva Gomes, ba Komandante Polísia Munisípiu Ermera, tanba kestaun lei Funsaun Públika.

Notísia Relevante : Komandu Jerál PNTL “Muda” Komandante Na’in-25

Vise-Ministru Interiór, António Armindo. Imajen/Dok. Tatoli

Vise Ministru António Armindo,  hateten, Governu sei presiza Diretór Migrasaun Agostinho da Silva Gomes nia servisu hodi aprezenta planu no polítika servisu Migrasaun nian  kompleta ona foin buka desizaun muda fali nia ba servisu iha munisípiu

Iha loron 29 juñu 2020, Komandante Jerál PNTL, Komisáriu Faustino da Costa no Segundu Komandante Jerál, Komisáriu Mateus Fernandes, hasai ona desizaun hodi halo rotasaun servisu ba komandante PNTL na’in-28 inklui Diretór Servisu Migrasaun, Superintendente Xefe Agostinho da Silva Gomes, ba fali Komandante Polísia Munisípiu Ermera no Komandante UPF, Superintendente, João Belo dos Reis, muda fali ba Servisu Migrasaun.

“Diretór Jerál agora ne’e nia sei muda, momentu kuandu ita trava nia, labele muda lai. Ida, tanba kuandu ita haree nia muda ona mai   husi PNTL ba Servisu Imigrasaun nia tenke bazeia ona ba lei Funsaun Públika nian. Entaun iha lei funsaun públika ne’e iha desizaun ida fó sai ona, durante Dotasaun Orsamentu Temporáriu (DOT) ita labele muda ema. Ida seluk, ha’u ho ministru foun maka sei trava lai nia para ita la’o akompaña servisu sira ne’e lai,” hateten Vise Ministru António ba jornalista, ohin, iha Palaçio do Governo, Dili.

Notísia Relevante : Filomeno Paixão Sei Halo Rotasaun Ba Pesoál iha Servisu Migrasaun

António hatutan, hafoin akompaña servisu ne’ebé atuál Diretór Jerál Servisu Migrasaun, Agostinho halo no aprezenta kompleta ona, foin Governu muda tuir desizaun komandu PNTL.

Ministru António mós rejeita informasaun balun ne’ebé sirkula iha rede sosiál Facebook katak, nia parte la muda polísia servisu migrasaun balun ne’ebé hamosu kazu mal-administrasaun iha servisu Alfándega nian, tanba kestaun halo juramentu ba partidu KHUNTO.

“Ha’u la hatene, evidénsia ida ne’ebé maka hatete katak, nia (oknum polísia Migrasaun) membru KHUNTU ka lae, e nia ne’e polísia, ha’u la fiar isu ida-ne’e ema maka lansa isu sira-ne’e laloos hotu,” António rejeita.

Antes ne’e, Eis Ministru Interiór, Filomeno de Jesus da Paixão, hasai desizaun tuir regulamentu PNTL númeru despaxu 243/CG-PNTL.XI/2019  hodi muda membru polísia balun tanba deskonfia komete iha kazu korrupsaun iha tinan 2017-2019.

Desizaun ne’e eis Ministru Interiór Filomeno  Paixão hasai, tanba deskonfia membru ofisiais Alfándega balun halo falsifikasaun karimbu no tesi visa stiker no dobru karimbu.

Kazu ne’e rasik iha hela Prosesu Investigasaun Komandu PNTL liuhusi Seksaun Justisa PNTL no aprezenta ona ba Komisaun Anti-Korrupsaun (CAC).

Notísia Relevante : MI Submete Ona Kazu Migrasaun Ba KAK

Jornalista       : Eugénio Pereira

Editór             : Francisco Simões

 

HAKEREK NO HATÁN

Please enter your comment!
Please enter your name here