Vise-Ministru Interiór, António Armindo. Imajen/Dok.Tatoli

DILI, 24 agostu 2020 (TATOLI)- Governu Timor-Leste liuhusi Ministériu Interiór Diresaun Jerál Servisu Migrasaun, ofisiálmente lansa vistu negósiu klase I no klase II ne’ebé kategoria ba rejime laborál no migratóriu espesiál ne’ebé aplikavel ba projetu Bayu Undang.

Vistu negósiu ho klase I ho durasaun tempu fulan-neen (6), ne’ebé fó oportunidade ba investor  potensiál sira hodi esplora klima negósiu nasionál, inklui prosesu setup negósiu.

“Se buat hotu lao tuir planu negósiu nian, sei follow up ho vistu negósiu klase II ho durasaun too tinan-rua (2),” informa Vise Ministru Interior, António Armindo, liuhusi komunikadu imprensa ne’ebé Agência Tatoli asesu, ohin.

Lansamentu vistu ne’e hala’o direita husi Ministru Estadu Koordenadór ba Asuntu Ekonómiku (MECAE), Joaquim Amaral, Vise Ministru Interiór, António Armindo akompaña husi setór privadu sira.

Tuir polítika Governu nian ho lansamentu visa negósiu hodi komplementa vistu seluk ne’ebé durante ne’e la’o tia ona.  Vistu ne’e sei oferese ba ema estranjeiru ne’ebé  iha interese no hakarak halo atividade negósiu iha Timor-Leste bele viabiliza setór  negósiu  hodi bele la’o ba oin.

Governu Timor-Leste konsidera lansamentu ne’e nu’udar meiu ida atu dezenvolve aan liuhusi rekoopera ekonomia Timor-Leste.

“Ho serimónia lansamentu vistu negósiu ne’e, iha korrelasaun pozitivu ho polítika rekuperasaun ekonómiku Timor-Leste nian, tanba ne’e ema hotu iha responsabilidade institusionál atu asegura nia implementasaun ho di’ak, no importante liu maka oinsá bele ajuda setór  ekonomia produtivu nasionál,” dehan Vise Ministru António Armindo.

Nia husu ba ema hotu atu kontinua servisu hamutuk hodi bele fó susesu ba implementasaun vistu negósiu hodi hatama reseita barak liután ba kofre Estadu.

Membru Governu husi Partidu KHUNTO hato’o mós parabéns ba Diretór Servisu Migrasaun, Superintendente Xefe Agostinho da Silva Gomes, ho ekipa ne’ebé servisu di’ak hodi halo preparasaun ba lei sira.

“Ha’u mós hakarak aproveita kongratula Diretór Jerál Servisu Migrasaun ho ekipa ne’ebé integra funsionáriu sivíl no PNTL, mezmu ho kondisaun ne’ebé menus no falta buat barak, ita boot sira konsege hatudu dedikasaun no profisionalizmu, hodi bele garante vistu ba empreza petrolífera Santos, Austrália nian iha Timor-Leste, ne’ebé sai mós  hanesan investor  importante iha kampu Bayu Undang,” nia hateten.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here