Diretor FONGTIL, Diretór Ezekutivu Fórum Organizasaun Naun Govermentál Timor-Leste (FONGTIL), Daniel Santos do Carmo. Imajen/Antonio Goncalves

DILI, 24 agostu 2020 (TATOLI)–Diretór Ezekutivu Fórum Organizasaun Naun Govermentál Timor-Leste (FONGTIL), Daniel Santos do Carmo hateten, ohin, FONGTIL realiza formasaun ba membru sira ho objetivu atu hasa’e membru sira-nia koñesementu oinsá define planu estratéjiku dezenvolvimentu nasionál.

Daniel hatutan, formasaun ne’e hanesan parte ida ba dezenvolvimentu instituisionál membru FONGTIL sira-nian, hanesan FONGTIL nia papél ida mak fó kapasitasaun ba membru sira. Entaun formasaun ida-ne’e, FONGTIL orienta  ba planu estratéjiku oinsá maka atu ajuda Organizasaun Naun Governamental (ONG) sira bele define sira-nia objetivu estratéjiku. 

“Ohin ne’e, hanesan parte ida ba dezenvolvimentu instituisionál membru FONGTIL sira nian, hanesan ita hotu hatene FONGTIL nia papél ida fó kapasitasaun ba membru sira, entaun formasaun ida ne’e ita orienta  ba planu estratéjiku oinsá maka atu ajuda ONG sira bele define sira-nia objetivu estratéjiku atu bele kontribui ba ita-nia planu estratéjiku dezenvolvimentu nasionál no mós ninia objetivu moris,” dehan Daniel Santos do Carmo, ba jornalista sira iha salaun FONGTIL, Caicoli, Dili, segunda ne’e.

Diretór FONGTIL ne’e hatutan, formasaun ne’e ba parte daruak nian foku liu ba área Munisípiu Dili no durante semana ida membru sira sei aprende lisaun foun maka oinsá atu hatuur sira-nia objetivu estratéjiku ida ne’ebé maka di’ak bazea ba kapasidade interna no rekursu-umanu ne’ebé maka sira iha.

“Semana ida-ne’e formasaun foku liu ba matéria planu estratéjiku. Entaun iha planu estratéjiku ne’e sei orienta ita-nia ONG sira atu bele define sira-nia planu estratéjiku hanesan posizaun ida, saida maka sira atu muda iha sosiedade no saida maka sira atu kontribui ba mudansa ne’ebé ita-nia povu hein,” nia dehan. 

Nai hatutan,  formasaun ne’e realiza hetan apoiu hosi Gabinete Apoiu Sosiedade sivíl (GASC) bazea ba kada Aplikasaun hosi Dotasaun Orsamentu Temporária (DOT) formasaun ida bele apoiu to’o $7.000

Entretantu Asistente Téknikiu GASC, Edvin Duarte Soares Noronha, hatutan iha Orsamentu dudésimu ba fulan jullu  nian aprova rihun $20 ba FONGTIL hodi selebra formasaun no apoiu ba instituisionál durante fulan ida-nian.

Nia dehan, formasaun sira ne’e faze dahuluk hala’o iha semana kotuk no ohin faze daruak iha Dili maibé nivél rejionál sira halo tiha antes ne’e iha Oeste, Leste no Norte, inklui Rejiaun Administrativa Espesiál Oé-Cusse Ambeno (RAEOA).  

“Treinamentu ida ne’e luihosi esforsu lubuk ida dala-uluk halo mapeamentu tanba ita hatene antes ne’e mapeamentu totál organizasaun sosiedade sivíl iha Timor laran tomak ne’e hamutuk 300 ne’e organizasaun nasionál. Maibé hafoin mapeamentu ita konsege redús ona 300 ne’e tún ba 201, ne’e nivél teritórriu Timor laran tomak inklui RAEOA,” nia dehan.

Nia hateten, mapeamentu ne’e atu haree kapasidade ezekusaun, instituisionál, tanba durante ne’e organizasaun sosiedade sivíl sira-nia realidade edifísiu laiha. Tanba ne’e, hosi  mapeamentu ida-ne’e konsege deskobrementu ba sasán sira-ne’e bele minimiza oraganizasaun hamutuk 300 tun ba 201.

Nia hateten, atu haree hosi sustentabilidade maka Governu iha komitmentu nafatin atu parséria ho organizasaun hotu-hotu, atu parseiru dezenvolvimentu dala uluk sira maka tenke leba sira-nia-aan liuhosi formasaun.

Tanba, tuir nia, antes ne’e problema ba organizasaun mak kapasidade instituisionál no kapasidade rekursu umanu. Tanba ne’e, liuhosi treinamentu ida-ne’e oinsá maka atu garantia katak ba futuru organizasaun hotu-hotu nia kontribuisaun la’o di’ak.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here