Eis guerrilleiru FALINTIL, Frederico Florindo ‘Kiak’, akompaña ho ninia maluk FALINTIL seluk, dada lia ho jornalista sira, hafoin hasoru malu ho Primeiru-Ministru, Taur Matan Ruak. Imajen Tatoli/António Gonçalves

DILI, 24 agostu 2020 (TATOLI)-Eis guerrilleiru Forsa Armada Libertasaun Nasionál  Timor-Leste (FALINTIL), Frederico Florindo ‘Kiak’, hamutuk ho membru FALINTIL seluk, hasoru malu ho Primeiru-Ministru (PM), Taur Matan Ruak.

“Ami kuaze tinan 20 la hasoru malu, entaun foin lalais ami halibur malu iha Konsellu Veteranu no mai hasoru Primeiru-Ministru hodi fó hanoin netik ba ami tanba tinan 20 resin ami nunka hasoru ami-nia kolega sira, ne’ebé balun mate ona no balun idade ona,” relata Frederico Florindo , iha Palásiu Governu, hafoin hasoru PM Taur.

Nia dehan, intensaun hasoru Xefe Governu, atu bolu hamutuk fali membru FALINTIL sira ne’ebé antes ne’e iha Munisípiu Aileu, nune’e iha komemorasaun ba loron boot sira hanesan loron FALINTIL no loron istóriku seluk bele mós hola parte.

Antes ne’e, iha 20 agostu 2020, FALINTIL lubuk ida deside ses husu akantonamentu Aileu tanba la konkorda ho desizaun momentu ne’ebá, transforma FALINTIL ba fali FALINTIL-Forsa Defeza Timor-Leste (F-FDTL).

Bazeia ba dadus hosi Sekretaria Estadu Antigu Kombatente no Libertasaun Naionál (SEACLN, sigla portugés) rejista veteranu ko kombatente iha Aileu hamutuk 1.395.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here