Ilustrasaun moratóriu kréditu. Imajen/Espesiál

DILI, 24 agostu 2020 (TATOLI)-Banku Nasionál Komérsiu Timor-Leste (BNCTL, sigla portugés) seidauk bele halo pagamentu ba benefisiáriu sira hosi programa moratóriu kréditu porsentu 60.

“Ita bo’ot sira ne’ebé hato’o ona aplikasaun ba moratóriu kréditu no aprovadu ona, BNCTL informa katak banku seidauk bele no la biban atu aplika suspensaun ba pagamentu prinsipál no diskonta juru porsentu 60 ba saláriu fulan-agostu 2020,” refere nota hosi Banku Komérsiu ne’ebé Agência Tatoli asesu iha segunda ne’e.

Notisia Relevante: BNCTL simu ona aplikante 3.197 ba programa moratóriu kréditu

BNCTL sei implementa programa ne’e iha fulan-setembru nia-laran.

“Aplikasaun ne’ebé aprovadu  hosi BNCTL no Banco Central Timor-Leste (BCTL) iha agostu 2020, sei devolve ba konta bankária prinsipál no juru porsentu 60, ne’ebé banku ko’a kliente sira-nia saláriu iha agostu ka sei implementa hahú husi fulan-setembru, konforme konkordánsia hosi banku no BCTL.

Nune’e mós, ba prosesu avaliasaun aplikasaun sei konklui iha 27 agostu 2020 no sei informa ofisialmente.

“Ami husu ho respeitu ba ita-bo’ot sira atu hein notifikasaun tuir mai, ba programa moratóriu kréditu ne’e no sei publika iha pájina BNCTL nian,” apela BNCTL.

Ba programa moratóriu kréditu, BNCTL simu ona aplikante hamutuk 3.197 no hosi númeru ne’e, individuál, funsionáriu públiku ka kontratadu hamutuk na’in-3.154 no ba empreza hamutuk 43.

Iha loron 23 jullu maka Banku Sentrál ne’e ofisialmente fó sai anúnsia katak loke aplikasaun ba programa moratóriu kréditu no kliente sira bele aplika liuhosi sistema online ne’ebé banku ne’e rasik dezenvolve.

Jornalista: Antónia Gusmão

Editora: Julia Chatarina  

 

HAKEREK NO HATÁN

Please enter your comment!
Please enter your name here