Atividade iha kampu petrolífera, Bayu-undan. Imajen/Espesiál

DILI, 24 agostu 2020 (TATOLI)-Autoridade Nasionál Petróleu no Minerál (ANPM) kontinua halo monotorizasaun no inspesaun iha kampu Bayu-undan no Darwin LNG, hodi garante iha faze tranzisaun ne’e atividade produsaun bele la’o normál nafatin.

“Hafoin aseita no aprova Santos hanesan operadór, papél ANPM mak hala’o nafatin monitorizasaun, auditoria no inspesaun ba fasilidade iha kampu Bayu-undan no Darwin LNG hanesan baibain hodi asegura operasaun atividade produsaun nian la’o nafatin hanesan normál,” tenik Diretór Esplorasaun no Promosaun ANPM, Mateus da  Costa,  ba Agência Tatoli, liuhosi  email, segunda ne’e.

Nune’e, daudaun Santos mak sai hanesan operadór ba produsaun kampu Bayu-undan, tanba ne’e Diretór Mateus da Costa, dehan ANPM ninia papél hanesan reguladora mak fó aprovasaun ikus ba prosesu finál transasaun komérsiu no aseita Santos hodi sai fali hanesan parseria (joint venture partner).

Nia haktuir, molok atu aseita no aprova transasaun ne’e, ANPM halo avaliasaun ba kapasidade tékniku no finanseira empreza australiana Santos, hodi asegura katak iha duni kapasidade atubele opera iha kampu petrolífera.

Empreza Conocophillips rasik molok deside fa’an interese ba Santos, sei halo uluk avaliasaun.

“Rekursu umanu operasionál iha kampu Bayu-undan sei nafatin mantein no laiha mundansa, maski iha mudansa ba kompañia. Nune’e mos ba ekipa jestór sira ba operasionál ninian sei nafatin mantein,” nia akresenta.

Diretór ne’e esplika, maski iha transasaun sosa no fa’an asaun entre Conocophillips ba Santos, maibe laiha impaktu ba atividade operasionál, jestaun tékniku no lala’ok serbisu iha terrenu mantein nafatin.

Empreza Santos nu’udar operadór foun Bayu-undan, ne’ebé sosa partisipasaun Conocophillips ne’ebé akumula porsentu 60-resin no mós sai operadór iha kampu petrolífera ne’e.

Iha loron 28 maiu 2020, Conocophillips finaliza ona prosesu fa’an ativu petrolífera ne’ebé lokaliza iha Norte Austrália ba kompañia petrolífera australiana, Santos Limited.

Conocophillips fa’an ninia interese iha planta prosesamentu Liquefied Natural Gas (LNG) Darwin iha kampu Bayu-undan, Barossa no Poseidon ho montante biliaun $1,4.

Interese ne’ebé tama iha akizisaun ativu Conocophillips maka hanesan negósiu envolve iha kampu Bayu-undan, rezerva seluk inklui mós eskritóriu iha Perth, Darwin no mós iha Dili.

Durante ne’e, projetu Bayu-undan kontribui reseita ba Estadu Timor-Leste, liuliu ba fundu mina-rai hamutuk biliaun $20 resin.

Hafoin retira husi projetu Bayu-undan, Conocophillips sei konsentra ba projetu iha Australian Pacific LNG iha Queensland.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here