Membru FALINTIL no veteranu rezistensia, Agostino Gaio “Sida-Butar”. Imajen/Eugénio Pereira

DILI, 20 agostu 2020 (TATOLI) –Iha lala’ok  luta povu Timor-Leste nian ba ukun rasik-an, envolvimentu no kontribuisaun boot eroi no veteranu sira-nian importante tebes atu jerasaun ba jerasaun la bele haluha.

Notísia Relevante : PR Lú Olo husu povu fó onra ba asuwain FALINTIL

Membru FALINTIL no veteranu rezisténsia, Agostino Gaio “Sida-Butar” partisipa iha selebrasaun loron FALINTIL ba dala-45 iha Kuartél Jenerál F-FDTL, Fatuhada, Dili, kinta (20/08). Imajen/Eugénio Pereira

Veteranu husi Frente Armada, Frente Diplomátiku no Frente Klandestina sira-nia kontribuisaun ba nakfilak rai “lulik” ida-ne’e sai nasaun kmanek no valor boot tebes.  Tanba ne’e, veteranu sira merese duni atu hetan apresiasaun no atensaun  husi Estadu no merese respeita husi povu ida-ne’e.

Ironia tebes. Bainhira nasaun ne’e hakat dook daudaun no independénsia ona tinan-18 (20 maiu 2002-20 maiu 2020), lala’ok moris veteranu barak mak sei susar tebes no balun mukit tebes to’o veteranu balun komesa ema haluha daudaun ona.  Maske nune’e, sira-nia espíritu luta nunka lakon iha sira-nia moris.

Simplisidade Agostinho Gaio “Sida-Butar”, tinan 61, nu’udar veteranu rezisténsia no membru FALINTIL sai hanesan ezemplu konkreta. Maske moris susar tebes iha faze ukun-an ne’e, maibé nia nunka reklama ba Estadu ka ba Governu atu tau-matan ba nia ka fó hahán ba nia.

Veteranu rezisténsia tinan-24 luta kontra invazór Indonézia, Agostinho Gaio “Sida-Butar”, maka nu’udar membru FALINTIL ne’ebé uluk kaer kilat tiru-monu aviaun elikópteru Tentara Nasionál Indonézia (TNI) nian iha área Liaruka, Postu Administrativu Ossu, Munisípiu Viqueque iha tinan 1998.  Maibé, tanba nesesidade moris, ohin loron ukun-an, Sida-Butar ka’er ai-suak hodi halo to’os bele aguenta moris no sustenta família uma-laran, liuliu haree nia oan na’in-ualu (feto na’in-haat no mane na’in-haat) ne’ebé Nai haraik hela ba nia ho nia kaben Marcelina Barreto de Jesus.

Veteranu ne’e moris iha Aldeia Lauhare, Postu Administrativu Laga, Munisípiu Baucau, daudaun ne’e, hela iha Baucau Vila hamutuk ho nia fen-kaben no oan na’in-ualu moris susar tebes.

Ho nia liman-fuan-10 no ho apoiu korajen husi nia kaben Marcelina Barreto de Jesus, sira-na’in-rua halo sakrifisiu rasik hodi haree sira-nia nesesidade uma-laran no eduka oan sira ba eskola to’o balun iha ona nivel ensinu superiór.

“Ha’u nia hakarak ne’e ha’u nia oan sira tenke eskola hotu, maibé dala ruma atu selu de’it oan sira-nia eskola susar tebetebes, entaun balun maka eskola, balun seidauk bele kontinua eskola,” hateten Sida-Butar bainhira dada-lia ho jornalista Agência Tatoli iha ámbitu  selebrasaun loron FALINTIL ba dala-45 iha Kuartél Jenerál FALINTIL-Forsa Defeza Timor-Leste (F-FDTL) iha Fatuhada, Dili, kinta (20/08).

Sida-Butar reforma husi F-FDTL fila ba vida sivíl iha tinan 2018 no daudaun ne’e moris iha situasaun difisil no susar  no atividade ne’ebé nia halo hodi luta ba aguenta moris maka halo to’os kuda batar, ai-fariña, talas no ai-han sira seluk tan.

Liuhusi selebrasaun tinan-45 loron FALINTIL, “Sida Butar” la husu buat ruma ba Estadu atu fó ba nia, maibé nu’udar sidadaun no luta na’in ida, nia husu de’it Estadu atu halo lei ida valoriza veteranu hotu-hotu, tanba tuir nia katak veteranu merese atu hetan tratamentu espesiál husi Estadu atu bele sente independénsia nia valor.

“Ha’u nia kondisaun moris ne’e la iha liu, ha’u triste tebes too agora uma de’it la iha para ha’u bele moris kontente ho ha’u nia oan sira,” Sida-Butar hateten.

Ho problema mukit ne’ebé veteranu ne’e, no veteranu sira seluk tan hasoru, Sida-Butar espera Estadu bele tau konsiderasaun hanesan mós regalia seluk ne’ebé eis titulares sira hetan depois  sira nia mandatu ukun tinan-lima (pensaun vitalisia).

“Ita nia funu hotu ona, ami so husu de’it ba Estadu atu tau matan ba ami nia moris, se ita moris la di’ak oinsá ita bele sente ukun-an ida ne’e. Se Estadu hanoin halo netik uma mahon ida ba ami bele hela, para molok ami mate bele goja netik ukun rasik-an ida-ne’e,”  Sida-Butar tenik.

Sida-Butar hatutan, nia kolega veteranu balun rasik foin lalais ne’e moras de’it too mate no Estadu la fó buat ruma ba faluk ho oan sira nu’udar problema boot ida ne’ebé presiza hetan atensaun.

“Sida-Butar”, veteranu tinan-24 iha ai-laran no iha Timor-Leste nia independénsia, hahú iha tinan 2000 nia kontinua kontribui servisu iha Komandu F-FDTL to’o tinan 2018 foin reforma fila ba vida sivíl.

Ho idade joven, nia partisipa iha luta libertasaun nasionál iha kedas tinan 1975 too 1979. Bainhira forsa gerrilla iha Baze de Apoiu Matebian rebenta no gerrilleiru barak mate, nia ho kolega sira seluk kontinua nafatin luta.

Sida-Butar nia komandante maka “Eli Fohorai Boot ka L-7”. Hamutuk ho FALINTIL sira seluk reziste iha ai-laran hodi defende povu Timor nia integridade no soberania.

Iha istória funu Timor-Leste nian , Sida -Butar mós koñesidu hanesan ho asuwa’in FALINTIL sira seluk ne’ebé brani tebes ho de’it kilat mauzer, nia tiru monu aviaun TNI nian área foto leten Liaruka, Ossu, Viqueque iha tinan 1998.

Elikópteru TNI nian ho modelu Bell-205 ho númeru rejistu HA-5069 ne’ebé hetan tiru no monu, maske rezulta Pangdam Udayana Mayjen TNI Rachmat Budiyanto, kanek de’it, mas nia soldadu sira ne’ebé akompaña nia iha elikóptru ne’e nia laran kuaze mate hotu.

Militár Indonézia ka TNI hirak ne’ebé mate kompostu husi Pangdam IX Udayana Mayjen TNI Yudhomo Sastrosoehardjo no Komandante Korem 164/Wira Dharma Dili Kol (Inf) Salamat Sidabutar, inklui membru na’in-10, hanesan, Asisten Operasi Kasdam IX Udayana Kol (Inf) Satria Buana, Asisten Intelijen Kasdam IX Udayana Kol (Inf) Pangandaran Napitupulu, Komandan Sektor A Kolakops (Komando Pelaksana Operasi) Timtim Kol (Inf) Jodi Kusuma, Kepala Seksi Operasi (Kasiops) Korem 164/WD Letkol (Inf) Simson G Sigar, Kapten CPL Kusmayadi (pilotu), Kapten CZI Mawi Asmawi (kopilot), Letda (Inf) Arifin (Ajudan Pangdam), Serka Supardi, dan Sertu Sutardjo (tekniku aviaun).

Sida-Butar haktuir katak aviaun ne’e semo husi dook, nia iha foho tutun prepara ona ho kilat Mauzer molok atu tiru aviaun ne’ebé semo besik no rabat ba nia, nia rasik sei hamulak ba “Kakaluk” ne’ebé nia lori, maka foin tiru hasoru aviaun ne’e.

“Ha’u maka tiru duni elikópteru ne’e, ha’u hanoin katak sira hanesan ita nia inimigu iha funu, sira mak oho ita nia maluk sira barak, inklui ha’u nia komandante sira balun mate ona. Entaun aviaun ne’e, ha’u haree nia semo mai, ha’u  iha foho-leten hamulak tiha ba rai-lulik ne’e maka tiru kona elikópteru ne’e, lakleur ha’u haree aviaun komesa monu ona, ha’u mós retira kedas,” Sida-Butar konta tuir.

“Ha’u ladún hatene distánsia hira, maibé ha’u haree aviaun ne’e semo mai rabat besik kedas mak ha’u tiru hasoru kedas ba aviaun nia oin, depois maka aviaun ne’e semo ba monu ona, ha’u hamulak ona katak, sira (TNI) maka oho ita nia maluk Timoroan barak, entaun se sira ne’e laran mós karik ha’u tiru la kona, maibé ha’u tiru kilat musan ida de’it maka kona kedas,” nia konta tenik.

Sida-Butar hatutan, tanba iha funu nia laran hodi luta ba rai ne’e nia ukun-an, tanba ne’e nia nunka arrepende bainhira foti kilat kontra inimigu hodi lori nasaun ba vitória ne’ebé hakat ho terus no sofrimentu oin-oin durante tinan-24 iha nia laran.

Jornalista       : Eugénio Pereira

Editór             : Francisco Simões

1 KOMENTÁRIU

  1. Kasian Los…Sira luta tiha Ukun an…mais estadu nungka tau matan ba sira…..Sebele karik estadu tau etik matan ba sira nebe vetaran sira bele hean betik salary ruma hodi devida sira nia keluarga nia moris….

HAKEREK NO HATÁN

Please enter your comment!
Please enter your name here