Adjuntu Autoridade Munisípiu Dili, Jose F. X. Smith. Imajen/Ozoria A. Marques

DILI, 21 agostu 2020 (TATOLI)-Ministériu Administrasaun Estatál (MAE) hamutuk ho Komisaun Funsaun Públika, sesta ne’e ezonera ona Adjuntu Administradór Munisípiu Dili, José Filipe Ximenes “Zeca” Smith husi ninia kargu Sekretáriu Munisípiu Dili tanba deskonfia komete irreguralidade.

Ministru Administrasaun Estatál (MAE), Miguel Pereira de Carvalho, hateten rezultadu inspesaun MAE nian foinlalais ba iha Administrasaun Munisípiu Dili deskobre Zeca Smith komete duni irregularidade balun.

Mezmu nune’e Governante ne’e la esplika detallu kona-ba irregularidade saida maka José Filipe Ximenes komete ona.

“Ita haree katak Sekretáriu Munisípiu Dili ne’e komete iha iregularidade balun entaun ita justifika ba Komisaun Funsaun Públika  hodi halo ezonerasaun nune’e mós fo biban ba Ministériu hodi propoin kandidatu seluk atu subtitui filafali servisu sesante nian,” dehan Ministru Administrasaun Estatál (MAE) ba Tatoli iha Caicoli, sesta (21/08).

Atu subtitui kargu ne’e, MAE propoin ona António Colão, hodi subtitui provizóriu to’o fulan-dezembru 2020 hodi hein prosesu rekrutamentu foun tuir méritu.

MAE iha ona planu sei halo rekrutamentu foun ba kargu Sekretáriu Munisipál iha Munisípiu hotu hodi subtitui kargu sesante tanba mandatu ramata ona.

Entretantu, Zeca Smith assume kargu ne’e hahú kedas mandatu Governu Aliansa Maioria Parlamentár (AMP).

Jornalista : Tomé Amado

Editór        : Agapito dos Santos

HAKEREK NO HATÁN

Please enter your comment!
Please enter your name here