Konsellu Diretivu inklui redasaun no funsionáriu administrasaun Agência Tatoli, hasai foto hamutuk komunidade bainhira halo retiru iha Marobo. Imajen Tatoli/Joanico de Araújo

DILI, 21 agostu 2020 (TATOLI)–Sekretáriu Estadu Komunikasaun Sosiál (SEKOMS), Merício Juvinal dos Reis ‘Akara’, propoin ona kandidatu rua hosi internál Agência Tatoli ba Ministériu Asuntu Parlamentár no Komunikasaun Sosiál (MAPKOMS), hodi substitui atuál Prezidente José da Costa, ne’ebé tuir ninia karta rezignasaun mandatu sei ramata iha 30 agostu.

“Durante ne’e iha Vise-Prezidente na’in-rua, ne’ebé ha’u hanoin ha’u-nia proposta la sees hosi sira na’in-rua,” informa Sekretáriu Estadu Akara ba Agência Tatoli, iha kinta (20/08), iha Kuartél Jerál FALINTIL-Forsa Defeza Timor-Leste (F-FDTL).

Notísia Relevante: Razaun profisionalismu, SEKOMS propoin kandidatu hosi internál substitui Prezidente Tatoli

Maski nune’e, Governante ne’e dehan kabe ba kompeténsia MAPKOMS no nia parte halo tuir kompeténsia ne’ebé atribui ba nia.

“Ha’u-nia karta tama ona ba MAPKOMS, agora ita hein Ministru nia desizaun, tanba desizaun ikus iha Ministru nia liman,” Akara akresenta.

Nia prefere kandidatu hosi internál mídia Estadu ne’e tanba hatene ona vizaun no programa prioridade.

“Husi parte ha’u-nian, ha’u prefere liu nomea ema internál tanba durante ne’e sira hatene ona planu, akompaña programa durante tinan-lima, serbisu mós di’ak no susesu barak maka atinje. Tanba ne’e, ha’u hanoin no konsidera sira internál ne’e di’akliu. Nune’e mós baze ba sira maka profionalizmu no esperiénsia ne’ebé durante ne’e sira iha, sira mós hatene ona instituisaun ninia lala’ok serbisu ka memória institusionál,” Sekretáriu Estadu ne’e argumenta.

Razaun seluk, nia nota Vise-Prezidente Tatoli na’in-rua durante ne’e halo ona planu barak ho atuál Prezidente José da Costa.

“Ha’u bele fó razaun ein jerál lai, tanba sira na’in-rua maka durante ne’e hamutuk ho Prezidente sesante halo planu serbisu. Maibé ita hein de’it Ministru  nia desizaun. Ha’u labele adianta uluk tanba ne’e kompeténsia Ministru nia atu temi naran no atu indika naran. Ha’u só fó referénsia de’it,” nia akresenta.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here