Sekretáriu Estadu Komunikasaun Sosiál, Merício Juvinal dos Reis ‘Akara’, akompaña ho Diretór Jerál, Ponciano da Cruz Leite, inklui Xefe Gabinete SEKOMS, Osório de Almeida, hato’o vizaun jerál iha diskusaun planu prioridade 2021, iha salaun ANC, Caicoli, sesta (21/08). Imajen/SEKOMS

DILI, 21 agostu 2020 (TATOLI)Sekretaria Estadu Komunikasaun Sosiál (SEKOMS) inklui diresaun ne’ebé hola parte, hahú diskute planu no prioridade iha 2021.

Sekretáriu Estadu Komunikasaun Sosiál, Merício Juvinal dos Reis ‘Akara’, hateten tuir delegasaun kompeténsia SEKOMS dirije serbisu iha Sentru Informasaun Téknika iha Komunikasaun (CEFTEC, sigla portugés) inklui Diresaun Nasionál Promosaun no Dezenvolvimentu Mídia Lokál (DNPDML) no Gabinete SEKOMS rasik.

“Ha’u hakarak hahú serbisu halo planu hamutuk ho diresaun sira no haree aprezentasaun planu no programa prioridade 2021,” tenik Sekretáriu Estadu Akara iha Salaun Autoridade Nacional Comunicação (ANC), Caicoli, sesta ne’e.

Diresaun sira aprezenta konseitu programa prioridade ne’ebé dezeña ona.

“Ha’u akompaña estratejia atu atinje objetivu, entaun Diretór ida-idak aprezenta ho apoiu tékniku hosi asesór sira, nune’e hamosu programa no prioridade klaru. Ha’u mós tau-matan ba sira-nia planu no progresu,” nia akresenta.

Iha diskusaun ne’e mós envolve Rádiu Televizaun Timor-Leste, Empreza Públika (RTTL, Ep) no Agência Tatoli, maski mídia estatál rua ne’e la tutela ona ba SEKOMS maibé tutela fali ba Ministériu Asuntu Parlamentár no Komunikasaun Sosiál (MAPKOMS).

“Ha’u konvida RTTL no Agência Tatoli atu akompaña, inklui Diresaun Nasionál Diseminasaun Informasaun (DNDI), atu sira fó kontribuisaun ideia no halo observasaun, tanba serbisu diresaun ne’ebé tutela ba SEKOMS, liga mós ba diresaun sira seluk,” nia relata.

Unidade Planiamentu Monitorizasaun Avaliasaun (UPMA) halo aprezentasaun detalladu kona-ba programa Governu no aprezenta template ba diresaun ne’ebé tutela ba SEKOMS.

Governante ne’e orienta atu CEFTEC hahú haree programa prioridade hanesan embriaun ba institutu formasaun jornalista.

“Ha’u-nia orientasaun maka haree programa no atividade prioridade no prepara atinje objetivu harii institutu jornalista iha tinan rua ho balu nia laran, inklui prepara kuríkulu, regra, no rekruta funsionáriu ka rekursu, formadór no prepara fatin atu nune’e bainhira institutu ne’e harii sira prontu ona,” nia subliña.

Nune’e mós ba DNPDML, governante ne’e husu atu hahú kolabora ho Autoridade Munisípiu sira atu harii infraestrutura hamutuk, prepara rekursu umanu iha nível munisípiu, prepara lejizlasaun no regra ruma atu reforsa dezenvolvimentu mídia iha munisípiu.

Aleinde ne’e, SEKOMS iha ona hanoin atu halo diverfikasaun meiu komunikasaun sosiál.

Ba Gabinete SEKOMS, atu bele apoiu diresaun sira no prepara planu no rekursu umanu.

“Ha’u-nia kompeténsia foku ba diresaun rua no ha’u hakarak konsentra atu halo buat ruma ho di’ak ho diresaun rua ne’e, tanba normalmente ita lidera diresaun oituan, ita tenke hatudu susesu no kualidade serbisu di’ak,” nia akresenta.

Akara otimizta diresaun rua ne’ebé nia lidera sei la’o ho di’ak tamba sei serbisu hamutuk ho diresaun seluk inklui meiu komunikasaun sosiál hanesan RTTL no Agência Tatoli.

“Ha’u konsentra iha kontabilidade ba Primeiru-Ministru, katak diresaun ne’ebé ha’u lidera, sei lidera hó sériu no disiplina maka’as, tanba ne’e ha’u sei la halimar ho diresaun ne’ebé tutela,” nia afirma.

Nia refere ba Sentru Rádiu Komunidadade (CRC, sigla portugés) ne’ebé muda ona naran ba DNPDML, durante ezisténsia hanesan motór ba dezenvolvimentu mídia iha munisípiu.

“Ha’u sei ko’alia ho mídia nasionál inklui mídia Estadu hanesan RTTL no Agência Tatoli, atu kolabora hamutuk bainhira dezenvolve infraestrutura iha munisípiu, do que sira halo edifísiu ketak iha munisípiu tanba saida maka la aproveita infraestrutura munisípiu no fahe espasu ba malu,” nia fó hanoin.

Tuir nia, Governu hakarak konsentra hamutuk Autoridade Munisipál dezenvolve sentru ida ba mídia hotu, ne’ebé hanesan polítika SEKOMS aprezenta ona iha tinan-lima liubá, atu diversifika meiu komunikasaun soiál iha área rurál no ninia implementasaun hahú ba daudauk liuhosi DNPDML.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here