Emprezáriu timor-oan no atuál Presidente CCI-TL, Oscar Lima. Imajen Tatoli/Egas Cristovão

DILI, 21 agostu 2020 (TATOLI)Relasiona ho ho polítika Governu atu halo rekuperasaun ekonómika, emprezáriu timor-oan no atuál Prezidente Kámara Komérsiu no Indústria Timor-Leste (CCI-TL, sigla portugés), Oscar Lima, husu ba Governu atu investe barak iha Banku Komersiál atubele aplika juru di’ak.

“Ami husu ba Ministru Koordenadór Asuntu Ekonómiku no ekipa elaborasaun planu rekuperasaun ekonómika atu tau osan iha banku sira iha Timór, maibé prinsipálmente iha Banku Nasionál Komérsiu Timor-Leste (BNCTL, sigla portugés) atubele fó juru di’ak, atu ema bele halo indústria,” hateten Prezidente CCI-TL, Oscar Lima iha ámbitu lansamentu Restaurante Mr. Frango iha Caicoli, sesta ne’e.

Tuir emprezáriu timor-oan ne’e, bainhira laiha investimentu iha banku, maka sei labele rezolve kestaun rekuperasaun ekonómika.

“Enkuantu buat sira ne’e ita la halo, ha’u hanoin laiha rekuperasaun ekonómika,” nia akresenta.

Nia dehan, Governu presiza kapitaliza BNCTL, nune’e bele aplika juru ki’ik hodi emprezáriu bele halo investimentu iha setór produtivu hanesan agrikultura.

“Lei sira seidauk klaru didi’ak, kona-ba falénsia no Lei Rai iha ona maibé seidauk iha dekretu-lei hodi fó sertifikadu, entaun buat sira ne’e hotu halo banku sira la konsege fó kréditu ho juru ki’ik. Ami ko’alia ona ho banku sira no sira dehan juru aas ne’e tanba risku ne’e aas tebes”, dehan nia.

Biban ne’e, Oscar Lima husu ba Parlamentu Nasionál (PN), katak bainhira iha proposta ruma husi Ministériu Koordenadór Asuntu Ekonómiku (MKAE) kona-ba kapitalizasaun BNCTL, presiza defende iha diskusaun tanba importante bele fó kréditu ba ema barak hodi loke ninia atividade ekonómiku.

Hatan ba preokupasaun ne’e, Deputadu Bankada FRETILIN, Francisco Miranda Branco, konfirma katak momentu iha hanoin atu kapitaliza, BNCTL foin estabelese, entaun Estadu labele fó konfiansa automátikamente hodi fó investimentu boot liu no tenke iha prosesu provasaun.

Deputadu Bankada FRETILIN, Francisco Miranda Branco. Imajen Tatoli/Jogerjo Guterres

“Entaun hahú ho investe millaun $5, maibé agora liu tiha ona teste ida-ne’e, hatudu katak ita-nia banku nasionál mós bele, entaun tempu ona atu Estadu investe liután iha ita-nia banku nasionál,” dehan reprezentante povu ne’e.

Entretantu, bainhira hahú fó kréditu, BNCTL aplika juru porsentu 17 no agora hahú porsentu 6 to’o 12, enkuantu ba veteranu aplika ho juru espesiál ho porsentu 6

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here