Husi karuk ba loos, Komandante Komponente Navál F-FDTL, Kapitaun João Silva, Tenente Koronél Forsa Defeza Nova Zelándia, Martin Drasfield no Forsa Austrália hasai fotografia hamutuk iha selebrasaun loron FALINTIL ba dala-45. Dili, 20 agusto 2020. Imajen/Eugénio Pereira

DILI, 21 agostu 2020 (TATOLI)- Governu Nova Zelándia liuhusi Forsa Defeza Nova Zelándia sei kontinua kapasita membru FALINTIL-Forsa Defeza Timor-Leste (F-FDTL) hodi prepara-an envolve iha Forsa Manutensaun Paz Organizasaun Nasoins Unidas (ONU).

Notísia Relevante : Nova Zelándia Apoiu Millaun Ida ba TL Prevene COVID-19

Tenente Koronél Forsa Defeza Nova Zelándia, Martin Drasfield ne’ebé halo servisu tinan-20 ona iha Timor-Leste konsidera F-FDTL iha progresu di’ak tebes, tanba Nova Zelándia no Australia servisu hamutuk kapasita membru sira aprende lian Ingles iha Sentru Formasaun Metinaro, inklui treina kona-ba regra oinsá atu servisu no envolve iha misaun ONU.

Nia dehan, Nova Zelándia apresia tebes, F-FDTL no PNTL balun komesa ba hala’o ona misaun iha ONU nu’udar observadór.

“Dezde tinan 2000 too agora tanba Nova Zelándia  fakar raan mós ba Timor-Leste, ami iha kometimentu boot tebes hodi ajuda F-FDTL no Nova Zelándia ho Austrália daudaun ne’e fó hela formasaun ba membru F-FDTL sira ho Institutu Defeza Nasionál Timor-Leste hodi prepara forsa F-FDTL bele hola parte ba misaun ONU iha futuru,” dehan Komandante Martin Drasfield  ba Agência Tatoli iha ámbitu selebrasaun loron FALINTIL ba dala-45, kinta (20/08), iha Kuartél Jenerál F-FDTL, Fatuhada, Dili.

Lori Governu no Forsa Defeza Nova Zelándia nia naran, Tenente Koronél Martin hato’o parabéns ba susesu no progresu ne’ebé Komandu F-FDTL hetan durante iha área formasaun rekursu umanu no ekipamentu servisu no infraestrutura nian.

“Ha’u kontente tebes- tebes dezenvolvimentu F-FDTL no dezenvolvimentu Timor-Leste agora komesa la’o di’ak no dalan di’ak no labarik barak komesa eskola,” nia hateten.

Forsa no sivíl Nova Zelándia mate ba independénsia TL

Xefe Estadu Maiór Jenerál F-FDTL, Majór Jenerál Lere Anan Timor akompaña husi Tenente Koronél Forsa Defeza Nova Zelándia, Martin Drasfield presta omenajen ba Forsa Nova Zelándia, Private Leonard Manning ne’ebé hetan oho husi milísia pro-Indonézia iha Foho Debalulik, Covalima, iha loron 24 jullu 2000. Imajen/Nova Zelándia.

Iha parte seluk, durante prosesu luta ba libertasaun nasionál, forsa Nova Zelándia, ema sivíl no jornalista balun mós mate  iha Timor-Leste.

Iha loron  iha 24 jullu 2000, sidadaun Nova Zelándia Private Leonard Manning hetan oho husi milísia iha fatin batalla iha Foho Debalulik, ne’ebé serve iha fronteira hanesan parte husi Batallaun Nova Zelándia nian ho Nasoins Unidas nia forsas estabilizasaun ba paz nian.

Alende ne’e, Sidadaun Nova Zelándia sira mós hetan oho no Governu Nova Zelándia liuhusi Embaixada Nova Zelándia hamutuk ho Forsa Defeza Nova Zelándia (NZDF) foin lalais ne’e halo serimónia memoriál rua iha Covalima, ida iha Foho Debalulik iha fatin ne’ebé, Matebian Forsa Nova Zelándia, Len Manning hetan oho, no ida seluk iha F-FDTL nia fatin iha Tilomar besik iha crus ne’ebé mak hari husi B-Coy, NZBATT2 iha 2000.

Serimónia hirak ne’e atende husi Majór Jenerál Lere no reprezentante husi F-FDTL, eis Primeiru-Ministru, Rui Araujo, Embaixadór Korea, Adidu Defeza Austrália, Portugál, Filipina, Brazil no Indonézia no reprezentante husi komunidade Covalima no Tilomar.

Ohin loron Nova Zelándia kontinua hanoin  Private Manning nia sakrifisiu no sakrifisiu husi nia família nian ho mós sidadaun Nova Zelándia na’in-neen (6) seluk ne’ebé mate hodi luta ba TL nia independénsia hanesan,  Gary Cunningham-16 October 1975 iha Balibo, Kamal Bamadhaj-12 November 1991, Massacre Santa Cruz, Dili, Warrant Officer Tony Walser – 30 November 1999, Staff Sergeant Billy White – 25 April 2000, Private Len Manning – 24 July 2000, Private Boyd Atkins – 14 March 2001, no Private Dean Johnston – 28 July 2002.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here