Ministru Asuntu Parlamentár no Komunikasaun Sosiál, Francisco Martins da Costa Jerónimo. Imajen Tatoli/Egas Cristovão

DILI, 21 agostu 2020 (TATOLI)-Ministru Asuntu Parlamentár no Komunikasaun Sosiál (MAPKOMS), Francisco Jerónimo, hateten molok foti desizaun, nia parte konsulta ona kandidatu Prezidente Agência Tatoli interinu ba Primeiru-Ministru (PM), Taur Matan Ruak.

Prezidente Agência Tatoli, José da Costa hatama karta rezignasaun ba MAPKOMS iha loron 04 agostu no sei asume knaar atuál to’o loron 30 agostu.

”Desizaun ne’ebé ha’u foti, ha’u konsulta no ko’alia ona ho Primeiru-Ministru, atu foti desizaun hahú uluk ho internu,” informa Ministru Francisco ba Agência Tatoli, iha kinta (20/08), iha Kuartél Jerál FALINTIL-Forsa Defeza Timor-Leste (F-FDTL).

Notísia Relevante: MAPKOMS simu karta rezignasaun Prezidente Agência Tatoli,IP

Nia mós konfirma, simu ona proposta hosi Sekretáriu Estadu Komunikasaun Sosiál (SEKOMS), Merício Juvinal dos Reis ‘Akara’, ne’ebé propoin preferénsia ema na’in-rua hosi internál mídia estatál ne’e.

“Ema na’in-rua maka Sekretáriu Estadu haruka mai ha’u-nia meza atu haree no foti desizaun, maibé ha’u mós iha fali preférensia seluk iha ha’u-nia meza leten, iha kandidatu lima maibé depois maka ha’u haree,” nia dehan.

Governante ne’e konsidera proposta ne’ebé SEKOMS submete ne’e normál no tuir regra.

“Sira aprezenta mai, maibé desizaun ikus iha ha’u-nian liman no ha’u maka sei deside, sé maka ha’u atu hili, orsida ha’u deside,” Ministru subliña.

Tuir Ministru Francisco, nomeasaun Prezidente Tatoli foun sei akontese antes mandatu Prezidente sesante ramata.

“Fixu antes Señor José nian mandatu ramata ha’u sei foti desizaun. Ha’u sei haree no halo diskusaun ho ha’u-nia tékniku sira, tanba presiza opiniaun hosi parte balun atu foti desizaun ida,” nia realsa.

Iha loron 5 dezembru 2018, José da Costa nomeadu nu’udar Prezidente Konsellu Diretivu Ajénsia Notisioza Timor-Leste, Tatoli ba mandatu tinan-haat liuhosi desizaun Konsellu Ministru.

Prezidente Agência Tatoli simu pose iha 21 dezembru 2018 no hala’o serbisu loloos iha inísiu janeiru 2019 to’o agora.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here