Eis Prezidente Republika, José Ramos Horta, lansa Restaurante Mr. Frango, iha Caicoli, sesta (21/08). Imajen Tatoli/Jogerjo Guterres

DILI, 21 agostu 2020 (TATOLI)Movimentu Asaun Ekonomia Komunitária (MAEKOM) lansa restaurante ida ho naran Mr. Frango ne’ebé maka lokaliza iha Suku Caicoli, Postu Administrativu Vera-cruz, Munisípiu Dili.

Koziñeiru Mr. Frango, Cesar Lourdes, agradese MAEKOM tanba iha inisiativa di’ak harii restaurante ne’e.

“Ho produtu ne’ebé MAEKOM prodús, ami sei prosesa ai-han fresku, nutritivu, kualidade di’ak no presu sei baratu ba ema hotu. Objetivu hakarak kria no promove ai-han ho ingrediente maihosi produtu lokál no ami tenta porsentu 90 uza produtu lokál, ne’ebé maioria produtu uza hosi MAEKOM,” tenik Cesar Lourdes iha seremónia lansamentu Restaurante Mr. Frango, iha Caicoli, sesta ne’e.

Nia agradese tanba nu’udar koziñeiru sein produtu labele halo buat ida, maibé MAEKOM ho inisiativa bele prodús produtu.

“Objetivu loke restaurante ho inisiativa atu kria, diversifika no promove, katak ami hakarak bolu maluk timor-oan sira ne’ebé hatene tein no la hetan serbisu, ami bolu mai hamutuk. Liuhosi restaurante ne’e ami kria postu serbisu maski ki’ik maibé bele fó serbisu ba maluk timor-oan,” nia subliña.

Tinan ne’e sei lansa restaurante lima tán iha Dili

Mr. Frango sei fornese variadade ai-han ba kliente no bele asesu diretamente iha restaurante ka bele lori to’o odamatan serbisu fatin, uma ka ne’ebé de’it, inklui fornese quatrain service ba eventu ruma.

Prezidente MAEKOM, Rui Castro, hateten movimentu ne’e planea tinan ne’e sei halo lansamentu restaurante Mr. Frango ho menu hanesan, iha sidade Dili hamutuk lima.

Prezidente MAEKOM, Rui Castro. Imajen Tatoli/Jogerjo Guterres

Iha tinan 2021, Mr. Frango sei perkore iha munisípiu 12 inklui Rejiaun Espesiál Oé-cusse Ambeno (RAEOA), no fatin estratéjiku sira hanesan fronteira Batugade, Atabae, Laklubar, Natarbora, no fatin estratéjiku identifikadu seluk.

“Ami hahú investimentu rasik hosi membru MAEKOM, ami agradese tebes ba ema hotu ne’ebé mak apoia no habelar informasaun kona-ba MAEKOM hodi ohin loron movimentu ne’e boot ba bebeik. Mr. Frango sei habelar ba fatin hotu no sei oferese produtu orgánia,” nia subliña.

Eis Prezidente Repúblika, José Ramos Horta apresia ho inisiativa MAEKOM bele promove ona produtu lokál.

“Ha’u admira tebes MAEKOM nia inisiativa, tanba sira-nia estatutu bandu simu apoiu hosi Governu,” nia apresia.

Eis Prezidente Repúblika, José Ramos Horta. Imajen Tatoli/Jogerjo Guterres

Laureadu Nobel Páz ne’e fó hanoin, restaurante nasionál ne’e di’ak maibé tein mós tenke di’ak no kualidade hodi korresponde ba presu razoável bele atrai ema.

Restaurante Mr. Frango lansa husi Eis Prezidente Repúblika, José Ramos Horta, akompaña mós husi Madre Guilhermina Marçal, Reprezentante Ministériu Turizmu, Komérsiu no Indústria (MTKI), Prezidente Kámara Komérsiu no Indústria Timor-Leste (CCI-TL, sigla portugés), Oscar Lima, Prezidente Administrasaun Banku Komérsiu, no parseiru MAEKOM sira.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here