Bee-moos. Imajen/Espesiál

ERMERA, 21 agostu 2020 (TATOLI)-Pessoal Apoia Administrasaun Suku Railaco Kraik, Germenino da Costa, hateten durante ne’e komunidade iha Suku Railaco Kraik, Postu Administrativu Railaco, Munisípiu Ermera, halerik ba bee-moos.

“Bee-moos sai preokupasaun, iha duni bee-matan ida konstrui hosi FALINTIL-Forsa Defeza Timor-Leste (F-FDTL) iha tinan 2017 no bee-matan ida mós konstrui hosi kompañia Asulau iha tinan 2016, maibé to’o oras ne’e bee sira ladi’ak hotu ona,” dehan Germenino da Costa, ba Agência Tatoli, sesta ne’e, iha Suku Railaco Kraik.

Reprezentante suku ne’e haktuir, iha tinan 2019 Xefe Suku halo ona pedidu ba Servisu Água no Saneamentu (SAS) munisípiu atu haree ba kestaun ne’e maibé seidauk iha resposta.

“Hosi parte Governu Sentrál seidauk mai halo vizita tanba ami seidauk halo pedidu. Ami iha ne’e ho totál populasaun 69.500 hosi uma-kain hamutuk 375, afeta hotu ba bee-moos,” nia akresenta.

Tuir Germenino da Costa, durante ne’e komunidade sira ba kuru bee-moos dook, hola bee rasik no dalaruma aluga karreta tula komunidade ba mota hodi bele asesu bee.

Iha fatin hanesan, komunidade Suku Railaco Kraik, Carlos Pereira Soares rekoñese katak  durante ne’e komunidade suku ne’e difísil asesu bee, tanba ne’e husu Governu bele tau-matan.

“Ami iha ne’e difísil tebes, bee-moos monta hosi enjeñeria F-FDTL ba komunidade ne’e a’at ona no laiha manutensaun, husu ba SAS  tau-matan ba kestaun ne’e tanba durante ne’e ami la’o ba bee-matan dook maizumenus kilo rua ka tolu,” nia subliña.

Nia dehan, durante ne’e Organizasaun Naun Govermentál (NGO) maka apoia bee-moos ba komunidade.

“Komunidade sira hola bee hosi karreta, ne’ebé sira ba kuru iha Mota Hare, nune’e mós Merry Kiclop Today hola mós bee hodi distrubui ba komunidade,” nia akrsenta.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here