Seremónia pose ba grupu feto potensiál iha Suku Railaco Kraik, sesta (21/08). Imajen/Natalino Costa

ERMERA, 21 agostu 2020 (TATOLI)-Grupu feto potensiál iha Suku Railaco Kraik, Postu Administrativa Railaco, Munisípiu Ermera, ho inisiativa rasik kria kooperativa kréditu uniaun, hanaran Bedma Hatutan ba Futuru (BEHAFU) no iha sesta ne’e realiza seremónia pose ba estrurura, ne’ebé partisipa hosi Sekretáriu Estadu Kooperativa, Elizário Ferreira.

Prezidente kréditu uniaun BEHAFU, Olinda Freitas, sente kontenete tanba ho esforsu durante ne’e bele hamutuk ho feto maluk sira hodi kria kooperativa kréditu iha sira-nia suku rasik.

“Ida-ne’e hanesan orgullu ba ami, tanba durante tinan barak ami hein hela ida-ne’e,” tenik  Dirijente ne’e, iha Suku Railaco, sesta ne’e.

Prezidente kooperativa kréditu ne’e promete durante nia manadatu sei buka esforsu oioin atu lori kooperativa ba oin no sai grupu ne’ebé organizadu.

“Ha’u nia mandatu ba oin ha’u hakarak buka motiva grupu sira atu hamutuk lori kooperativa ne’e ba oin sai di’ak liután,” nia akresenta

Nia agradese ba Organizaun Naun Governamentál ne’ebé ho esforsu durante ne’e bele fó kapasitasaun no re-organiza filafali grupu feto potesiál atu tulun la’o ba oin no kontribui ba prosesu dezenvolvimentu.

“Ami sente kontente ho Merry Meckilopp Today tanba durante ne’e ho sira-nia tulun, liuhosi formasaun oinoin maka bele organiza ami to’o bele harii kooperativa ida, ami agradese tebes,” nia apresia.

Iha fatin hanesan, Pesoál Apoia Administrasaun Suku Railaco Kraik, Germenino da Costa, hateten nia parte orgullu tanba nia suku eziste ona kooperativa ida.

“Ha’u sente kontente ohin haree Sekretáriu Estadu Kooperativa mai to’o iha ami-nia le’et hodi fó pose ba estrurura kooperativa kréditu BEHAFU.

Tuir responsável ne’e, ho kooperativa ida bele hafásil komunidade suku bele asesu ba kréditu.

“Uluk kuandu komunidade sira presiza osan tenke bá Ermera Villa atu impresta osan iha kooperativa kréditu, maibé ohin loron kooperativa kréditu iha ona Railaco Kraik no bele hafásil komunidade asesu kréditu bainhira presiza buat ruma,” Germenino esplika.

Nia husu estrutura kooperativa ne’ebé simu pose labele tau interese oinoin, maibé buka dezenvolve kooperativa ho di’ak, nune’e bele benefisia komunidade sira iha suku ne’e.

Sorin seluk, Sekretáriu Estadu Elizário, husu grupu feto potensiál ne’ebé maka harii kooperativa atu hatudu kompromisulori kooperativa sai di’ak liután.

Governante ne’e orgullu ba grupu feto iha Railaco bele harii kooperativa ho inisiativa rasik.

“Ha’u hakarak enkoraja imi la’o ba oin nafatin ho kompromisu ne’ebé imi iha daudaun no nafatin hatudu espíritu, labele iha deskonfiansa ba malu,” Sekretáriu Estadu fó hanoin.

Nia orgullu haree kooperativa harii hosi grupu feto, ne’ebé foin tolu maka eziste hanesan kooperativa LANAMONA, kooperativa kréditu uniaun grupu feto Railaco Leten no ida iha Dili

Tuir Elizário, harii kooperativa la’ós atu hetan rendimentu no kuandu iha hanoin atu hetan lalais rendimentu, ne’e la’ós kooperativa.

“Iha área kooperativa nian, VIII Governu hakarak kria suku ida kooperativa rua, Tanba ne’e ho esforsu hanesan ne’e bele benefisia komunidade ein jerál,” nia realsa.

Partisipa iha seremonia pose ne’e maka Reprezentante rezidente Merry Meckilopp Today, ekipa SEKoop, autoridade lokál inklui komunidade.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here