Veteranu no Eis-Kombatente Nasionál, Costódio Belo "Alin Laek". Foto Espesiál

DILI, 21 agostu 2020 (TATOLI)–Veteranu no Eis-Kombatente Nasionál, Costódio Belo “Alin Laek”, hateten Forcas Armadas da Libertação Nacional de Timor Leste (FALINTIL) mak hamosu esperitu ukun-aan no deside independénsia ba vida Timor Leste nian.

Notísia Relevante: Veteranu barak moris iha mukit nia laran

“FALINTIL mak hamosu esperitu ukun-aan no deside independénsia ba ita-nia rai doben Timor-Leste. Tanba ne’e, ohin, loron ema hotu-hotu haksolok hodi partisipa loron Nasionál ne’e, ” dehan Veteranu no Eis-Kombatente Nasionál, Costódio Belo “Alin Laek”, ba Agência TATOLI hafoin partisipa Aniversariu FALINTIL ba dala-45 iha Kuartel Jeneral, Fatuhada, Dili, kinta ne’e.

Nia haktuir tan, loron 20 agostu 1975 mak loron sakrifísiu ne’ebé ema barak fakar raan no lakon vida, tanba ne’e presiza valoriza nafatin sira-nia luta no sakrifisiu. 

Alin Laek hateten, ohin FALINTIL kompleta ona ba tinan 45, tanba ne’e Estadu presiza tau matan ba ema sira ne’ebé mak fakar raan no  lakon vida iha ai-laran tanba funu no rai doben Timor-Leste. 

“Estadu presiza hadi’a ka tau matan ba ema ne’ebé mak luta ba funu no tau-matan ba família ne’ebé mak lakon vida ba rai ida ne’e,” nia dehan. 

Aleinde ne’e, nia husu atu Estadu mós tenke tau matan FALINTIL no veteranu FALINTIL sira ne’ebé reforma ona tanba Estadu no Governu mak sai inan-aman ba nia povu.

“Tanba ne’e, kompeténsia no responsabilidade inan-aman hanesan Estadu no Governu ba nia povu sira mak oinsá veteranu FALINTIL sira mós hetan moris di’ak iha ámbitu ukun rasik aan nia laran ne’e,” nia dehan.

Notísia Relevante: Estadu iha dever valoriza veteranu FALINTIL sira

Jornalista : Osória Marques

Editór      : Cancio Ximenes

HAKEREK NO HATÁN

Please enter your comment!
Please enter your name here