Xefe Estadu Maiór FALINTIL-Forsa Defeza Timor-Leste (F-FDTL), Majór Jenerál Lere Anan Timur. Imajen/Egas Cristovão

DILI, 20 agostu 2020 (TATOLI)- Iha ámbitu komemorasaun loron FALINTIL a dala 45, ohin, Xefe Estadu Maiór FALINTIL-Forsa Defeza Timor-Leste Komandu (F-FDTL) Majór Jenerál Lere Anan Timur,  husu ba lider rezisténsia, Kay Rala Xanana Gusmão, Taur Matan Ruak, Francico Guterres “Lú Olo”  atu hadook sira ida-idak  nia diverjénsia polítika hodi fó liman ba malu hametin unidade no hakotu impase polítika atu bele dudu dezenvolvimentu Timor-Leste.

Notísia Relevante : Espíritu FALINTIL lori nasaun ba prósperiedade

Xefe Estadu Maiór Jenerál F-FDTL, Majór Jenerál Lere Anan Timor dehan, bainhira lider sira ne’e kontinua fila kotuk ba malu, nasaun no povu ne’e maka sei sofre.

 “Ami fó apelu ba lider nasionál no istóriku sira hotu atu fó liman ba malu. Maun Boot Xanana Gusmão, maun Taur Matan Ruak no maun Lú Olo. Ita tenke hamutuk haree ba kotuk! Ita nia perkursu iha tinan-24 nia laran iha ai-laran, imi nia komportamentu, imi nia relasaun ba malu, imi nia domin ba malu ne’e oinsá? Uluk iha ai-laran, ita nia is rusa nian ka, naan maran nian ka, nuu maran nian mós ita la hewai malu. Ita han hamutuk no toba hamutuk, terus hamutuk. Maibé, ohin loron, ita haree situasaun ne’e oin seluk ona,” hateten Lere Anan Timur liuhosi nia diskursu iha komemorasaun aniversáriu FALINTIL ba dala-45  iha Komandu Jenerál  F-FDTL, Fatuhada, Dili.

Lere afirma tan, impase polítika rai-laran hahú 2017 too agora mosu beibeik, tanba lider sira la unidade.

“Ami hare katak líderes sira iha planu internu ladún harmonioso. Ami haree katak, sira dodook malu hela. Iha kotuk sira hasoru malu karik, ne’e sira-nia segredu, nu’udar ema ki’ik ami la hatene. Uluk, FALINTIL nia únika esperansa ba ninia sobrevivénsia atu hetan independénsia mak iha lideres sira, iha planu internu no mós iha planu externu. Bainhira husi rai-li’ur ami rona “East Timor”, FALINTIL iha ai-laran hot-hotu basa liman. “East Timor” ne’e ba di’ak ka ba aat mós hot-hotu basa liman. No ohin loron líderes sira husi planu externu mós iha problema. Balu hakarak dada, hakarak hamoris fila fali problema uluk nian. Ita apela, di’ak liu lalika temi tan to’o situasaun “base de apoio” nian, maibé hakerek de’it iha istória ba jerasaun foun sira. Bainhira ita ko’alia kona ba “base de apoio” no ita akuza malu, la iha ema ida ne’ebé liman mós! Hanoin de’it tinan 1976, 1977 to’o “base de apoio” rahun, FRETILIN oho ema hira? Sé mak deside? Tan ne’e, mak di’ak liu ita lalika akuza malu, sé mak hakarak, hakerek de’it iha istória atu ema hot-hotu, liuliu jerasaun foun sira bele hatene kona-ba istória ne’e,” Lere hateten.

Lere husu mós ba líderes sira iha planu externu, Mari Alkatiri, José Ramos Horta, Rogério Tiago Lobato, Roque Rodrigues atu hamutuk fó solusaun di’ak ba destinu nasaun no povu atu moris hakmatek.

“Ami husu ba líderes sira iha planu externu, Maun Marí, Maun Ramos Horta, Maun Rogério Lobato, Maun Roque Rodrigues, ami mós iha kuriozidade atu hatene imi nia istória! Imi nia servisu, imi nia relasaun ba malu. Ida ne’e mak importante mai ami. Husi ne’e mak ita bele manan konsiénsia hodi tane hamutuk ita nia rai, no ita nia povu bele moris iha progresu no dezenvolvimentu nia laran,” nia apela.

Lere mós preokupa, ohin loron veteranu sira tempu hirak ne’e aproveita hasoru malu de’it iha kongresu ruma, la hasoru malu ho regular. Iha distánsia ba malu, nune’e ema seluk tama iha klaran no bele sobu sira-nia unidade no sira-nia domin no konfiansa ba malu.

Lere husu atu veteranu sira hotu presiza rona malu nafatin, halo enkontru beibeik no regulár, tau neon hamutuk, haree dalan ne’ebé di’ak liu, oinsá lori povu no nasaun ne’e ba oin.  Tanba Timoroan hamutuk mak lori nasaun ba independénsia, no veteranu nafatin responsabilidade hamutuk atu ho neon no laran ida kontribui ba dezenvolvimentu.

Iha oportunidade ne’e, Komandante Lere apela ba jerasaun patriota ne’ebé lidera hosi José Lobato nu’udar jerasaun FALINTIL nian atu kontribui sira-nia an hodi hetan konfia ba futuru dezenvolve nasaun ne’e hodi fó valór ba eroi sira ne’ebé mate iha funu libertasaun nasionál.

“Imi nia aman-inan sira terus, susar, balu mate ba independénsia, imi tenke la’o tuir imi nia inan-aman sira-nia ain-fatin. Imi tenke hamutuk nafatin, organiza malu atu dezenvolve ita nia rai, ita moris iha Timór, ita hotu Timór-oan, buka halibur mós sira ne’ebé nia inan-aman ita nia opozisaun atu hamutuk ita dezenvolve ita nia rai,” Lere Anan Timur tenik.

Serimónia aniversáriu FALINTIL  ne’e termina ho atividade desportu dada tali entre membru F-FDTL Komponente Naval hasoru PNTL Unidade Polísia Marítima, Jerasaun Patriota hasoru  Komandu Jenerál  F-FDTL.

Veteranu triste lider sira fahe malu

Veteranu Alin Laek. Imajen/Antonio Goncalves

Iha parte seluk, veteranu rezisténsia, Alin Laek dehan, sira sente triste tebes bainhira lider rezisténsia, Xanana, Taur no Lú Olo ne’ebé uluk luta hamutuk ho sira too tempu indesénsia  fahe malu iha polítika.

Alin Laek dehan, importante liubá lider rezisténsia sira bele palku polítika tuir demokrasia sira bele fila kotuk ba malu, maibé sira tenke hatudu nafatin sira-nia nasionalizmu hodi hamutuk dezenvolve nasaun no povu nia moris.

“Iha politikamente sira bele sei kotuk ba malu, maibé ha’u nia haree hanesan karau aman-rua tuku-malu iha kampu-laran ne’ebá, husu para bibi aman ida labele tama ba klaran, polítika ne’e nune’e duni. Mais sira atu fahe malu sobu Estadu no nasaun ne’e sei la akontese,” Alin Laek hateten.

Veteranu ne’e hatutan, nasaun ne’e atu hetan estabilidade polítika di’ak, so lider sira ne’e maka tenke hamutuk liu-liu, Xanana, Taur no Lú Olo maka sai nu’udar komandu da luta FALINTIL, maibé ohin loron sira kaer órgaun soberanu hanesan prezidente no governu insusesu.

Nia hatutan, lider sira-ne’e ohin loron sai eroi no luta door, tanba veteranu barak ne’ebé terus ba rai ne’e maka fó títulu ba sira nu’udar lider hodi komanda funu ne’e too hetan vitória.

Jornalista   : Eugénio Pereira  

Editór        : Francisco Simões

HAKEREK NO HATÁN

Please enter your comment!
Please enter your name here