Prezidente Repúblika, Francisco Guterres Lú Olo. Imajen António Gonçalves

DILI, 20 agostu 2020 (TATOLI)—Prezidente Repúblika, Francisco Guterres “Lú Olo”, husu ba ofisiál, sarjentu no prasa iha F-FDTL atu kaer-metin valór sira hosi Forsa Armada Libertasaun Nasionál Timor-Leste (FALINTIL).

“Forsa Defeza Timor-Leste, hanesan instituisaun kontinuadór hosi FALINTIL, ne’ebé sei lidera hosi Asua’in FALINTIL sira, hanesan Lere Anan Timur, Falur Rate Laek, Sabika Besi Kulit, Aluc Descartes, Mau-Nana no sira seluk, iha devér atu hatene istória no kaer-metin valor sira hosi FALINTIL nian, hanesan sakrifísiu, prinsípiu ne’ebé metin no kapasidade atu reziste, biar laiha meiu,” dehan Xefe Estadu iha nia mensajen ne’ebe hato’o iha ámbitu selebrasaun loron FALINTIL ba dala-45, iha Kuartél Jenerál, Fatuhada, Dili, kinta ne’e.

Xefe Estadu hateten, valor hirak ne’e atu F-FDTL bele kaer metin no adapta iha misaun ne’ebé diferensa no transforma tuir konjuntura modernu nian hanesan iha kapasidade atu apoia Povu iha dezastre naturál no domina teknolojia foun sira.

Xefe Estadu haktuir, FALINTIL mosu iha tempu ne’ebé Timoroan sira fahe malu tanba diverjénsia polítika maibé ho lalais de’it FALINTIL sira kompriende sira-nia misaun prinsípal atu asegura dame ba Povu.

Tanba ne’e mak FALINTIL hatán ba apelu hosi líder FRETILIN, Nicolau Lobato, Mari Alkatiri no sira seluk, no  iha 20 agostu 1975,  sira  hala’o duni Insureisaun Jerál Armada ho objetivu atu hatuur kedas seguransa hodi lori ita-nia Povu moris hakmatek fila-fali iha 1975.

PR Lú Olo hateten, armadu FRETILIN nian mak FALINTIL hasoru inkursaun militar indonézia iha ita-nia fronteira-rai. Iha momentu ne’ebá, hodi fó resposta ba agresaun hosi invazor,  ita buka atu hasoru no trava sira-nia inkursaun iha ita-nia territóriu.

“Ita-nia eroína feto sira mós hamriik hasoru inimigu hodi hatudu sira-nia sentimentu patriota. Konsekuénsia ida mak ita lakon eroína di’ak Maria Tapó, ne’ebé hili dalan atu fó nia moris rasik ba ita-nia Pátria. Ha’u temi nia naran entre eroína sira seluk,” nia dehan.

Xefe Estadu haktuir, molok Indonézia lansa  operasaun militar ho eskala boot, iha 7 Dezembru 1975, Nicolau Lobato hatudu ninia kapasidade lideransa no organizadór, banhira nia rasik tun mai Sidade Dili hodi halibur no organiza populasaun tomak hodi rekua ba ai-laran.

Xefe Estadu ne’e lembra mós komandante FALINTIL sira seluk ne’ebé iha knaar importante iha momentu ne’ebá mak hanesan Rogério Lobato, Hermenegildo Alves, Fernando Carmo, Domingos Ribeiro, Espírito Santo, Guido Soares no sira seluk ne’ebé labele temi naran.

“Ha’u-nia respeitu tomak ba sira hotu no sira-nia familia,”  Prezidente Repúblika hato’o felisitasaun ba familia eroi no eroína sira.

Iha períodu 1975-1978, FALINTIL hasoru forsa okupasaun ho guerra-de-pozisaun hodi defende ita-nia territóriu, proteje ita-nia populasaun no loke dalan atu reforsa no hametin ita-nia patriotizmu. Iha períodu susar ida-ne’e, iha baze-de-apoiu mak ita hametin liután ita-nia unidade no konxiénsia nasionalista hodi hasoru funu naruk ida.

“Indonézia, ho Soeharto nia lideransa, simu ekipamentu militár foun no muda sira-nia estratéjia okupasaun ba ita-nia rai. Primeiru, okupa pontus estratéjiku, Dili, Baucau no Lospalos ho estratéjia de ‘guerra de desisão rápida,” nia haktuir.

Nia hateten, ne’e hatudu katak iha oras ruanulu resin haat (24) nia laran inimigu tenke manán funu, durante períodu ida-ne’e, diresaun luta–FRETILIN–ho barani hili estratéjia ‘guerra dura e prolongada’ no sura ho ita-nia forsa rasik, tanba fatór barak inklui fatór militár ka korrelasaun entre forsa rua ne’ebé hasoru malu.

Segundu, Xefe Estadu haktuir, halo retaliasaun no ikusmai ho kampaña serku no anikilamentu ne’ebé uza bombardeamentu hosi ró no aviaun no uza mós bomba Napalm, sira konsege harahun ita-nia bazes-de-apoiu. Rezultadu mak ita-nia populasaun hamlaha no forsa laiha. Nicolau Lobato mate iha kombate, iha loron 31 fulan Dezembru tinan 1978. Maibé, espíritu FALINTIL La Mate.

Xefe Estadu relembra, iha Marsu 1981, durante konferénsia iha Maubai, ne’ebé partisipa hosi membru sobrevivente nain rua husi Komité Sentral FRETILIN, Xanana Gusmão no Ma’ Hunu Bulerek Karataianu, FALINTIL hamriik ho estratéjia foun hodi adopta fali tátika gerrilla móvel ho lideransa komandante Xanana Gusmão nian, nu’udar Komandante das FALINTIL no Komisáriu Polítiku Nasionál hosi FRETILIN.

Iha Setembru 1981, Indonézia lansa fali operasaun boot ida naran `Opreasai Kikis` no ho ida-ne’e hamate  ita-nia kuadru polítiku no militares importante, hanesan Holi Natcha, Nelo Kadomi Timur, Saki Nere Ulas Timur no Hari Nere.

Operasaun ‘Kikis’ violentu tebes, tanba ne’e iha 13 Outubru 1981, durante selebrasaun Misa kampal iha Lecidere, Dili, Administrador Apostóliku Dom Martinho da Costa Lopes, ho espíritu Kristu nian, ho barani no koerénsia, publikamente denunsia hahalok violentu ida-ne’e.

Vontade atu buka solusaun pasífika ba rezolusaun konflitu iha ita nia rai hatudu kedas iha 1983, banhira ho efikásia hosi estratéjia FRETILIN no FALINTIL, Komandante Xanana Gusmão hasoru malu ho Komandante Purwanto, iha Ossú-Larigutu, hodi asina akordu hatun kilat.

Misaun defeza Pátria ne’ebé FALINTIL halo liga direta ho sentimentu Povu ne’ebé hakarak livre no soberanu. Ho sentimentu Povu nian ne’e,  Asua’in FALINTIL fó-aan tomak ba luta no barak mak lakon sira-nia vida.

Ho ida-ne’e,  Aswa’in FALINTIL konsege sai mós matadalan ne’ebé  inspira babeibeik Povu,  hodi reziste nafatin to’o ita hetan Ukun Rasik- An.

“Bainhira forsa Indonézia kaptura Komandante Xanana Gusmão, Komandante Ma’ Huno hamriik kedas hodi lidera FALINTIL. Bainhira forsa Indonézia kaptura Komandante Ma’ Huno, Nino Konis Santana mak kaer fali knaar  Komandante no hafoin  nia  mate, Komandante Taur Matan Ruak hamriik kedas hodi lidera FALINTIL. Istória FALINTIL nian hatudu reziliénsia no kapasidade atu hamriik fila-fali bainhira hetan susar. Tanba ne’e duni mak ita bolu Gloriozíssimas FALINTIL’,” nia hateten.

Notísia Relevante: PR Lú Olo husu CCLN identifika no buka solusaun ba veteranu falsu

Jornalista : Evaristo Soares Martins

Editór        :  Cancio Ximenes

HAKEREK NO HATÁN

Please enter your comment!
Please enter your name here