Ministru Obra Públika, Salvador Eugênio Soares dos Reis Pires, halo enkontru ho Diretór Jerál Água no Saneamentu, Gustavo da Cruz no ekipa tékniku sira, iha Gabinete MOP, Caicoli, tersa (18/08). Imajen/MOP

DILI, 20 agostu 2020 (TATOLI)-Ministru Obra Públika, Salvador Eugênio Soares dos Reis Pires, orienta ona Diresaun Jerál Água no Saneamentu (DGAS, sigla portugés) atu reabilita sanitáriu sira iha fatin públiku iha kapitál Dili.

Tanba ne’e maka Diretór Jerál Água no Saneamentu, Gustavo da Cruz sei koordena ho ekipa sira hodi halo reabilitasaun ba sanitáriu públiku sira iha merkadu Taibessi no Manleuana.

Tuir nota ne’ebé Agência Tatoli asesu kinta ne’e, DGAS sei halo koordenasaun ho Ministériu Administrasaun Estatál (MAE) liuhosi Jestaun Merkadu Munisípiu Dili hodi reabilita sanitáriu públiku sira, nune’e negosiante sira iha merkadu bele asesu no  uza ho di’ak.

“Husu ba públiku tomak, liuliu vizitante no  abitante iha merkadu Taibesi no Manleuana inklui iha fatin públiku sira seluk, atu uza sanitáriu públiku sira ho kuidadu,” apela Ministru.

Antes ne’e, Ministériu Obra Públika (MOP) no Ministériu Saúde (MS) instala sanitária no tanke bee iha fatin públiku sira atu populasaun bele hatoman-an fase liman bebeik molok no hafoin halo atividade.

Instalasaun sanitáriu ne’e aliña mós ba esforsu Governu Timor-Leste atu luta kombate surtu COVID-19.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here