Vise-Ministru Agrikultura no Peska, Abílio Xavier de Araújo. Imajen/Natalino Costa

DILI, 20 agostu 2020 (TATOLI)-Konservasaun Internasionál Timor-Leste (CI-TL, sigla inglés) realiza enkontru Project Steering Comittee, ba datoluk hosi projetu: asegura konservasaun longu prazu ba biodiversidade Timor-Leste no serbisu ekosistema liuhosi estabelese sistema área protejida nasionál no hadi’a jestaun rekursu naturál iha koridór basia-idrográfika prioridade nia-laran.

Vise-Ministru Agrikultura no Peska, Abílio Xavier de Araújo, konsidera reuniaun ne’e importante tebes tanba durante fulan-neen, hahú hosi fevereiru to’o jullu, ekipa sira halo monotorizaun ba ai-horis sira ne’ebé kuda iha munisípiu no hatudu ona rezultadu di’ak.

Tanba ne’e, Ministériu Agrikultura no Peska (MAP) ne’ebé tama iha prosesu ne’e, sei prepara kondisaun adekuadu ba protesaun área florestál.

“Ha’u hanoin ba futuru Ministériu sei kria polítika di’ak no prepara kondisaun adekuadu, liuliu iha rekursu atubele halo protesaun no konservasaun iha área florestál,” tenik Vise MAP Abílio Xavier, foin lalais ne’e, hafoin partisipa enkontru iha salaun enkontru Diresaun Jerál Floresta, Caicoli.

Governante ne’e nota katak, durante ne’e mosu inundasaun no mudansa klimátika iha fatin-fatin, tanba ne’e presiza medida atu rezolve.

“Iha tempu badak ekipa floresta MAP sei tun ba baze halo identifikasaun atubele tau ajenda iha prioridade, ne’ebé maka tenke urjentemente atu responde tuir kapasidade Estadu, tanba durante ne’e akontese inundasaun no dalaruma mudansa klimátika tanba ita nunka iha preparasaun ba ai-horis sira,” nia akresenta.

Daudaun MAP iha polítika ema ida ai-horis ida.

“Ministériu mai ho polítika ema ida kuda ai-oan ida, nia tenke iha responsabilidade ai-oan ne’e to’o tinan-ida. Tanba ne’e, ekipa agrikultura halo ona monitorizasaun ai-oan moris tebes ka lae, ne’e tenki iha ona reponsabilidade ba kada ema ida-idak,” nia subliña.

Nia dehan, ho planu MAP, espera ba oin reponsabilidade ne’e hanesan konseptu.

Abílio Xavier informa, Dotasaun Orsamentu Temporáriu (DOT) ne’ebé durante ne’e aloka ba MAP, maski limitadu maibé bele responde iha situasaun emerjénsia.

“Atividade balun ne’ebé maka bele halo, halo daudaun maibé bainhira la konsege halo, sei tau ba períodu 2020 no 2021 nian,” nia realsa.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here