Parada militár ba loron aniversariu FALINTIL ba dala-45 iha Kuartel Jenerál F-FDTL. Dili, 20 agostu 2020. Imajen/Egas Cristovão

DILI, 20 agostu 2020 (TATOLI) – Xefe Estadu Maiór Jenerál FALINTIL-Forsa Defeza Timor-Leste (F-FDTL), Majór Jenerál Lere Anan Timor, hato’o agradese boot ba nasaun parseiru sira ne’ebé kria kooperasaun militár hodi kontinua ajuda kapasita rekursu umanu no dezenvolvimentu infraestrutura instituisaun F-FDTL nian.

Notísia Relevante : Espíritu FALINTIL lori nasaun ba prósperiedade

Lere dehan, ajuda ne’ebé nasaun doadores sira oferese ba Komandu F-FDTL durante tinan-20 independénsia hetan progresu boot tebes.

“Ita kapasita nafatin ita nia rekursu umanu, servisu hamutuk ho ita nia parseiru internasionál sira hodi fó formasaun no treinamentu ba ita nia efetivu sira. Ita agradese nasaun belun sira, Estadus Unidus Amérika, Portugál, Austrália, Indonézia, Nova Zelándia, Malázia, Xina, Japaun ne’ebé ohin loron apoia formasaun no kapasitasaun ba efetivu F-FDTL nian,” dehan Lere Anan Timur iha selebrasaun loron FALINTIL  ba dala-45, ohin, iha Komandu Jenerál F-FDTL, Fatuhada, Dili.

Nia dehan, Austrália nu’udar belun di’ak ne’ebé apoia harii instalasaun ba espesialidade enjeñaria nian no formasaun Língua Ingles iha Metinaro.

F-FDTL agradese mós ba Governu Repúblika Popular Xina ba konstrusaun edifísiu Kuartél Jenerál no Bairro Militár iha Metinaro.

Ba oin, nia dehan, F-FDTL presiza meiu ba profisionalizmu Forsas Armadas nian. Liu besik tinan-20 ona, meius ne’ebé ohin loron Forsas Armadas iha la rekompensa ba sira-nia esforsu no preparasaun.

Lere afirma tan, Timor-Leste nu’udar nasaun joven, ho Forsa Armadas ne’ebé sei joven mós, hakarak atu iha relasaun di’ak ho nasaun hotu-hotu, liu-liu ho nasaun viziñu Indonézia no Austrália.

“Ami agradese dala ida tan ba nasaun belun sira hotu ne’ebé komprometidu fó nafatin sira nia kontribuisaun ba dezenvolvimentu no profisionalizmu Forsas Armadas nian. Timor-Leste sei konsolida metin liután nia relasaun no kooperasaun iha área militár iha futuru,” Lere agradese.

Ohin loron, Lere hateten, F-FDTL komemora hamutuk loron moris FALINTIL nian ba dala-45. Loron ne’ebé importante bainhira lideransa FRETILIN hahú marka ho Insurreisaun Armada iha Aisirimou, Aileu, iha 15 agostu 1975. Hahú hosi ne’ebá mak FALINTIL simu misaun nu’udar liman kro’at Povu Maubere nian hodi luta no defende direitu ba autodeterminasaun

Espíritu FALINTIL nian moris nafatin to’o ohin loron iha Forsa Defeza Timor-Leste, FALINTIL-FDTL, ne’ebé lori tutan kompromisu tane metin independénsia no Soberania Nasionál ne’ebé manan ho ruin no raan, no ba oin serbí nafatin interese povu no nasaun nian.

F-FDTL ho númeru efetivu ne’ebé to’o tuir planu, bele kumpre mós ninia kompromisu internasionál hodi kontribui ba operasaun manutensaun ba Paz iha Organizasaun Nasoins Unidas (ONU) nia mahon.

Jornalista   : Eugénio Pereira

Editór        : Francisco Simões

HAKEREK NO HATÁN

Please enter your comment!
Please enter your name here