Xefe Estadu Maiór Jenerál F-FDTL, Majór Jenerál Lere Anan Timur. Imajen Tatoli/Antonio Goncalves

DILI, 20 agostu 2020 (TATOLI)- Xefe Estadu Maiór Jenerál FALINTIL-Forsa Defeza Timor-Leste (F-FDTL), Majór Jenerál Lere Anan Timor, rekomenda ba Governu Timor-Leste atu halo lei ida rigorozu hodi regula membru grupu organizasaun arte marsiál sira ne’ebé reativa ona atu evita kria konflitu no violénsia beibeik iha nasaun ne’e.

Notísia Relevante : Asaltu iha Nunira, sunu uma-12 no na’in-rua kanek

Lere dehan, se Governu la halo lei hodi regula grupu GAM hirak ne’e, di’ak liu taka fila fali grupu organizasaun arte marsiál, tanba membru balun kontinua provoka no kria konflitu no violénsia iha rai laran hodi fó impaktu ba estabilidade seguransa interna.

“Kona-ba Artes Marsiál no Rituais ne’ebé uluk Governu bandu tiha ona, ami rekomenda ba Governu atu halo lei ne’ebé rigorozu atu regula sira, ka di’ak liu lalika autoriza sira nia ezisténsia, selae arte Marsiál no  rituais mak sai ameasa interna ba nasaun iha futuru,” afirma Lere Anan Timor liuhusi diskursu selebrasaun aniversáriu FALINTIL ba dala-45, ohin, iha Kuartél Jenerál F-FDTL, Fatuhada, Dili.

Lere dehan, Komandu F-FDTL no PNTL sei la tolera kuakér grupu organizasaun arte marsiál no arte rituál nia membru sira atu hamosu konflitu iha rai laran. Tanba nasaun Timor-Leste harii ho ema barak nia sofrimentu too ona tempu atu hetan paz kontribui ba dezenvolvimentu.

 “Ita hotu hatene katak bainhira ita restaura tiha ita nia independénsia no hahú ukun an, la’ós ema seluk ema let mak ukun rai ida ne’e. Ita nia ukun na’in sira hotu-hotu mai husi rezisténsia, tantu husi Frente Armada, Frente Diplomátika no Frente Klandestina. Sira ne’e mak kaer destinu rai ida ne’e nian. Maibé, ita haree katak dezenvolvimentu rai ida ne’e nian mak ohin loron la’o hanesan ne’e de’it! Ita hasoru mak impase polítiku no krize,” tenik Lere Anan Timur.

Atu lori Timor-Leste moris hakmatek, Komandu F-FDTL no PNTL sei kontinua servisu hamutuk hodi fó apoiu másimu ba estabilidade seguransa.

Jornalista   :  Eugénio Pereira  

Editór        : Francisco Simões

HAKEREK NO HATÁN

Please enter your comment!
Please enter your name here