Ministru Asuntu Parlamentár no Komunikasaun Sosiál, Francisco Jerónimo. Imajen Tatoli/António Gonçalves

DILI, 18 agostu 2020 (TATOLI)-Iha ámbitu selebrasaun loron Frente Armada Libertasaun Timor-Leste (FALINTIL) ba dala-45, Ministru Asuntu Parlamentár no Komunikasaun Sosiál (MAPKOMS), Francisco Jerónimo, felisita no agradese ba eroi sira-nia sakrifísiu.

“Ministru no funsionáriu hotu ne’ebé mak hamahan-an iha MAPKOMS, ami hato’o parabéns ba loron aniversáriu FALINTIL ba dala-45. Agradese ba eroi sira, liuliu FALINTIL sira ne’ebé mak sakrifika vida hodi ita ohin loron bele moris iha rai ida ukun-an,” hateten Ministru Francisco, ba Agência Tatoli, iha ninia knaar fatin, Palásiu Governu, tersa ne’e.

Governante ne’e konsidera, presiza fó onra no gloria ba Forsa Armada sira no haree ba oin hosi hamutuk serví nasaun ho dignu no responsabilidade, atu nune’e bele atinje nasaun ida nakonu ho paz, prospriedade no liberdade ba ema hotu.

MAPKOMS enkoraja povu tomak atu hametin nasionalizmu no patriotrizmu hodi dezenvolve nasaun sai di’ak liu.

“Buat ne’ebé maka Governu liuhusi MAPKOMS halo maka hahú buka tuir eroi sira-nia atividade iha tempu liubá, atu nune’e iha loron FALINTIL tuir mai bele fó sai ba públiku hotu katak sakrifísiu ne’ebé eroi sira halo iha tinan barak hodi atinje ukun-an,” Ministru subliña.

MAPKOMS durante ne’e iha diresaun ne’ebé maka toma konta fó formasaun ba ofisiál mídia sira hotu inklui mós mídia FALINTIL- Forsa Defeza Timor-Leste (F-FDTL) nian.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here