Aviaun Air Asia. Imajen/Flight Global

DILI, 19 agostu 2020 (TATOLI)-Xineza  hamutuk ema na’in 137 ne’ebé tersa ne’e to’o iha Timor-Leste, daudaun ne’e kumpre ona kuarentena obrigatóriu durante loron 14 ba prevensaun COVID-19 iha otél haat no kampaun kompaña Internasionál China Harbour Engineering  Tibar  Munisípiu Liquiça.

Koordenadora Jerál Komisaun Ezekutivu Saúde ba Surtu COVID-19, Odete da Silva Viegas, informa Sidadaun Xineza hirak ne’e tama ona iha kuarentena obrigatóriu iha tersa (18/08).

Daudaun ne’e sira hela iha Otél Fortuna, Otél Golgota, Big Family, Otél Timor-Plaza inklui Kampaun kompaña  China Harbour Engineering  Tibar.

 Notísia Relevante :Ohin, sidadaun xineza na’in-137 to’o Timor-Leste

Ekipa médiku destakadu iha fatin kuarentena obrigatóriu  hirak ne’e hodi fó asisténsia no mós kontrola ba propagasaun COVID-19.

“Sira kumpre nafatin regras COVID-19 nian sira uza  protesaun ba sira-nia aan tanba   sira maihusi fatin ne’ebé  mak risku no sira mós iha konsensia atu bele  proteze sira nia-aan  no proteze   ema seluk ne’ebé   mak iha sira-nia sorin sorin,’’ dehan Odete, durante konferénsia imprensa iha Caicoli Dili, kuarta ne’e.

Xineza hirak ne’e maioria traballadór husi kompaña Internasionál China Harbour Engineering ne’ebé servisu ba kontrusaun Portu Tibar.

Kompaña China Harbour Engineering maka selu sira-nia kustu durante hela iha kuarentena obrigatóriu.

Jornalista : Felicidade Ximenes

Editór       : Agapito dos Santos

HAKEREK NO HATÁN

Please enter your comment!
Please enter your name here