Reprezentante WFP iha Timor-Leste, Dangeng Liu, hamutuk ho traballadór umanitáriu iha Aeroportu Comoro. Imajen/Dangeng Liu

DILI, 19 agostu 2020 (TATOLI)Voo umanitáriu ba dala-ualu ho Malaysia Airlines, ne’ebé aluga hosi Programa Ai-han Mudiál (WFP, sigla portugés) to’o kuarta ne’e iha Aeroportu Internasionál Prezidente Nicolau Lobato, Comoro, tuku 11:45.

Aviaun ne’e sai hosi Port Moresby, Papua-Nova Guiné, la lori ekipamentu ruma maibé lori pasajeiru ualu hodi halo tránzitu iha Dili no sei liu ba Kuala Lumpur, Malázia.

“Aviaun ne’e la lori ekipamentu saúde, maibé tula de’it pasajeiru ualu hosi Port Moresby no sei tula tán pasajeiru 35 husi Dili ba fali Malázia. Nune’e totál pasajeiru hamutuk 43,” refere nota ne’ebé Agência Tatoli asesu iha kuarta ne’e.

Reprezentante WFP iha Timor-Leste, Dangeng Liu, husu traballadór umanitáriu sira fó asisténsia umanitáriu ho di’ak no la haluha nia felisita traballadór sira.

“19 agostu nu’udar Loron ba Traballadór Umanitáriu sira no sira kompromete hodi ajuda ema seluk, mezmu sira hasoru dezafíu ne’ebé aumenta ba beibeik,” dehan Dangen Liu.

Xefe ekipa ne’e kongratula komemorasaun Loron Traballadór Umanitáriu.

“Ha’u hakarak hato’o agradesimentu barak ba traballadór umanitáriu hotu, espesialmente ha’u-nia kolega hotu ne’ebé serbisu iha Organizasaun Saúde Mundiál (OMS) no WFP,” subliña Dangeng Liu

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here