DILI, 19 agostu 2020 (TATOLI)-Vise Primeiru-Ministru no Ministru Planu no Ordernamentu, José Maria dos Reis, ezonera Samuel Marçal hosi kargu Diretór Ajénsia Dezenvolvimentu Nasionál (ADN) no iha loron 17 agostu nomea Renato Mariano Monteiro da Cruz nu’udar Diretór foun.
Ezonerasaun ne’e bazeia ba kompeténsia no podér ne’ebé delega hosi Primeiru-Ministru (PM), Taur Matan Ruak ba Vise Primeiru-Ministru no Ministru Planu no Ordernamentu, José Maria dos Reis.
“Vise PM José Reis halo nomeasaun foun ne’e, bazeia mós ba esperiénsia Renato da Cruz, ne’ebé liga ho ADN rasik no mós ho funsionamentu Governu nian. Fiar katak sei bele fó kontribuisaun boot ba serbisu ADN nian, tuir polítika dezenvolvimentu ne’ebé VIII Governu buka atu implementa ba oin,” refere nota imprensa ne’ebé Agência Tatoli asesu iha kuarta ne’e.
Nomeasaun ne’e, José Reis halo hafoin enkontru iha loron 18 agostu ho ekipa ADN inklui ekipa sira hosi instituisaun relevante, iha sala reuniaun Ministériu Planu no Ordernamentu (MPO) nian.
“Vise PM agradese ba Samuel Marçal nia dedikasaun durante tinan-10, iha ninia knaar nu’udar Diretór ADN no husu atu bele kolabora nafatin ba tranzisaun hodi hamutuk kontribui ba dezenvolvimentu nasionál no agradese mós ba ekipa hotu nia serbisu, no husu atu kontinua serbisu hamutuk,” nota ne’e subliña.
Desizaun ne’e sei efetivu hosi loron publikasaun iha Jornál Republika iha loron 17 agostu 2020 no serimónia ofisiál ba tomada pose sei hala’o iha tempu badak nia-laran.
Jornalista: Florêncio Miranda Ximenes
Editora: Julia Chatarina
