Enkontru entre ekipa SEKOMS no Grupu CCYC, iha Palásiu Governu, kuarta (19/08). Imajen/SEKOMS

DILI, 19 agostu 2020 (TATOLI)Xefe Gabinete Sekretaria Estadu Komunikasaun Sosiál (SEKOMS), Osório de Almeida, hamutuk ho Diretór Sentru Rádiu Komunidade (CRC, sigla portugés), Abel da Conceição, no ekipa tékniku seluk, halo enkontru ho grupu Comoro Child and Youth Center (CCYC) hodi ko’alia kona-ba kooperasaun iha área komunikasaun sosiál.

Xefe Gabinete Osório de Almeida, hateten CCYC hakarak kolabora ho SEKOMS iha diseminasaun informasaun.

“Liga ba área komunikasaun sosiál, ami prontu kolabora ho CCYC iha kualkér atividade no programa sira ne’ebé iha,” tenik Xefe Gabinete ne’e hafoin enkontru, iha Palásiu Governu, ba Agência Tatoli, kuarta ne’e.

Reprezentante SEKOMS dehan, nia parte sei komunika ho Sekretáriu Estadu Komunikasaun Sosiál, Merício Juvinal dos Reis ‘Akara’ hodi bele haree ba kestaun ne’e.

Iha fatin hanesan, Diretór CCYC, Denio Malio Lopes, hateten CCYC nu’udar sentru formasaun ne’ebé eziste desde tinan-2000 no forma ona joven lubuk ida, no iha tempu hanesan rejista ona iha Fórum Organizasaun Naun Governament Timor-Leste (FONGTIL).

“Ami mai halo enkontru atu hato’o ami-nia programa no planu ne’ebé maka durante ne’e ami iha no husu SEKOMS atubele apoia ami iha kapasitasaun, liuliu iha deseminasaun informasaun nune’e bele konsensializa joven sira bele kapasita-an di’ak liután,” nia dehan.

Nia haktuir, durante ne’e organizasaun ne’e halo knaar hodi fó kapasitasaun ba joven sira liuhosi formasaun ba individu idaidak, ne’ebé identifika ninia abilidade hodi nune’e bele hasoru ezijénsia iha moris loroloron.

Reprezentante organizasaun sosiedade sivíl ne’e dehan, programa kapasitasaun ne’ebé realiza maka edukasaun sívika atu forma joven sai joven sivilizadu no formasaun mentalidade ba joven sira, nune’e bele hadook-an hosi konflitu.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here