Prezidente Repúblika, Francisco Guterres 'Lú Olo'. Imajen Tatoli/António Gonçalves

DILI, 19 agostu 2020 (TATOLI)Prezidente Repúblika (PR), Francisco Guterres ‘Lú Olo’, lameta ho deklarasaun grupu balun ne’ebé husu nia atu rezigna-an, tanba ne’e nia dehan Prezidente Repúblika povu mak hili, la’ós grupu ida mak hili.

“Konstituisaun la hateten dehan sidadaun sira atu eziji no obriga fali Prezidente Repúblika atu rezigna-an husi nia kargu. Prezidente Repúblika ne’e povu mak hili, la’ós grupu ida mak hili,” hateten Xefe Estadu hafoin partisipa misa ba komemorasaun Loron FALINTIL ba dala-45 iha Igreja Motael, kuarta ne’e.

Tanba ne’e, PR Lú Olo husu ba hirak ne’ebé halo deklarasaun ne’e, tenke tau an tuir Konstituisaun.

“Liberdade demokrasia ba ema hotu atubele halo, maibé tenke la’o tuir ninia dalan,” Xefe Estadu subliña.

Foin lalais ne’e Grupu Rezisténsia Nasionál Justisa, halo konferénsia imprensa hodi eziji PR atu rezigna-an.

Portavóz Rezisténsia Nasionál Justisa, Ángela Freitas, hateten bazeia ba revolusaun situasaun impáse polítika no violasaun lei inan, ne’ebé dura ona tinan-tolu no atu pasa ona tinan haat, halo Estadu soberanu moris iha inserteza nia-laran, ameasa povu nia unidade, halo fraku valór rezisténsia no papél prosesu demokrátiku ne’ebé sai fundamentu boot ba nasaun demokrátiku.

“Ami no ita hotu ne’ebé moris iha nasaun ne’e, hamutuk buka rezolve no hakotu impase polítika nasaun no Konstituisaun, violasaun prinsípiu no inserteza moris nasaun. Tanba ne’e, laiha tán solusaun seluk, ita hotu hamrik hamutuk halo protestu no asaun pasífiku hodi eziji Prezidente Repúblika atu rezigna-an,” subliña Portavóz.

Razaun husu rezigna-an, tuir grupu ne’e tanba Xefe Estadu maka abut no hun impáse polítika, kontra no viola prinsípiu Estadu, no livre prátika violasaun Konstituisaun.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here