Prokuradór Jerál Repúblika (PGR, sigla portugés), José da Costa Ximenes. Imajen/Egas Cristovão

DILI, 19 agostu 2020 (TATOLI) – Prokuradoria  Jerál Repúblika (PGR, sigla portugés), daudaun ne’e, hein hela desizaun Governu nian  atu fó solusaun ba kuadru pesoál ofisial ne’ebé PJR haruka ona ba Governu ho projetu estatutu Ministériu Públiku (MP) nian.

Notísia Relevante : PGR-instituisaun relevante sei destrui matéria prima droga tonelada 160

Tinan ida liubá, PGR José Ximenes, haruka ona ba Governu liuhusi Ministériu Justisa  kona-ba kuadru pesoál ofisial, maibé seidauk iha solusaun no haruka mós projetu estatutu MP nian ba Ministériu Reforma Lejizlativa no Asuntu Parlamentár (MRLAP) no PJR enkamiña fila-fali hodi bele iha desizaun ruma.

“Audiénsia ho Primeiru-Ministru ne’e  hodi follow up  asuntu sira oinsá Xefe Governu bele fó solusaun ruma, liu-liu kona-ba kuadru pesoál ofisial ne’ebé PJR haruka ona ba Governu através Ministériu Justisa iha tinan kotuk, maibé seidauk iha desizaun no kona-ba Projetu  estatutu Ministériu Públiku nian ne’ebé  haruka ba iha MRLAP antes ne’e no foin lalais mós parte PJR enkamiña fila-fali    hodi bele foti desizaun ruma,” informa PGR José Ximenes, ba jornalista sira hafoin enkontru ho Primeiru-Ministru (PM), Taur Matan Ruak, ohin, iha Palaçio do Governo.

Enkontru ho PM Taur ne’e ko’alia kona-ba materiál báziku sira  droga  nian ne’ebé konsta husi artigu 8, Lei  Droga nian númeru 2/2017, ne’ebé remete ba aneksu sira A-C.

“Materia báziku ba droga ninian ami haree lei númeru 2/2017 ladún apár ona  presiza alarga tan para bele prevee tan matéria balun kona-ba droga ninian,” informa PGR José Ximenes

Nia hateten, matéria báziku ba droga agora Tribunál la prevee iha lei atuál entaun Tribunál deside absolve kazu sira ne’ebé durante akontese, maibé felizmente matéria hirak ne’e Tribunál deside afavór ba  Estadu hodi halo destruisaun.

“Atu dehan saida, ita nia lei ida ne’e la prevee presiza haree para prevee, se la’e, Timor-Leste la’ós sai de’it fatin tránzitu ba droga, maibé sai mós tránzitu matéria báziku ba droga,” afirma PGR José Ximenes.

Jornalista   : Nelson de Sousa

Editór        : Francisco Simões

HAKEREK NO HATÁN

Please enter your comment!
Please enter your name here