Ministru Turizmu, Komérsiu no Indústria, José Lucas do Carmo Silva. Imajen Tatoli/Egas Cristovão

DILI, 19 agostu 2020 (TATOLI)Ministeriu Turizmu Komérsiu no Indústria (MTKI) sei esforsu no kontinua serbisu hamutuk ho nain ba supermerkadu no loja sira, atu nune’e bele fa’an povu agrikultór nia produtu.

“Ha’u no Vise halo ona konvokatóriu ho emprezáriu sira, hahú viajen ba área rurál hosi Maubisse to’o Same iha semana hirak liubá. Hosi vizita ne’e, haree katak maluk to’os nain sira preokupa tebes no dehan durante COVID-19, sira iha problema ho merkadu liuliu bainhira fa’an produtu sira,” informa Ministru Turizmu Komérsiu no Indústria, José Lucas do Carmo da Silva, iha Palásiu Governu, kuarta ne’e.

Notísia Relevante: MTKI vizita grupu ortikultura iha Maubisse

Ministru aprosima emprezáriu sira hodi promove produtu lokál.

“Maluk loja nain sira atu haree posibilidade esplora hanoin ruma oinsá maka bele akomoda produtu lokál no sira aseita sei halo tán diskusaun ba asuntu ne’e,” nia akresenta.

Governante ne’e hateten, MTKI hamutuk ho nain ba supermerkadu no loja sira sei desloka iha tempu badak atu haree povu agrikutór sira-nia produtu, liuliu produtu ortikultura atubele mai fa’an iha supermerkadu no loja sira.

“Fin semana ne’e, Vise Ministru Turizmu Komérsiu no Indústria rasik sei halo vizita hamutuk ho loja nain sira ba área rai-klaran hanesan Maubisse, Aileu, Same to’o Suai, nune’e bele observa no ko’alia ho agrikultór ortikultura  sira atu haree produtu saida maka bele fa’an, no halo konkordánsia entre agrikultór órtikultura rasik ho Ministeriu atu halo asaun ba futuru,” nia subliña.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here