Ministru Turizmu, Komérsiu no Indústria, José Lucas do Carmo Silva. Imajen Tatoli/Egas Cristovão

DILI, 19 agostu 2020 (TATOLI)-Ministru Turizmu Komersiu Industria, José Lucas do Carmo da Silva, hateten Governu Kuba hakarak tulun Ministériu Turizmu Komérsiu no Indústria (MTKI) atu dezenvolve setór turizmu iha Timor-Leste.

“Kuba disponível apoia Timór iha área turizmu, partikularmente atu haree iha área turizmu istóriku no relijioza. Aleinde ne’e, sira mós iha esperiénsia barak kona-ba espozisaun internasionál,” tenik Ministru José Lucas, iha Palásiu Governu, kuarta ne’e.

Governante ne’e nota katak, relasaun kooperasaun entre nasaun rua iha valór komum, tanba ne’e Governu Kuba hakarak ajuda Timor-Leste atu halo dezenvolvimentu iha área turizmu.

“Horiseik Embaixadór Kuba iha Timor-Leste mai kongratula ha’u hanesan ministru foun  no Embaixadór mai troka hanoin no esplora atu identifika setór saida maka  ita bele serbisu hamutuk, liuliu papél Ministériu Turizmu Komérsiu no Indústria ninian,” nia akresenta.

Aleinde ne’e, Kuba mós disponível ajuda Timor-Leste iha parke industriál.

“Governu Kuba disponível hakarak apoiu no serbisu hamutuk hodi haree ba parke indústria, tanba iha sira-nia rai iha parke industria barak, enkuantu Timór foin maka atu hahú. Tanba ne’e, iha posibilidade atu simu ida-ne’e hodi serbisu hamutuk ho sira   hodi partilla esperiénsia iha futuru mai,” nia subliña.

 Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here