Primeiru-Ministru, Taur Matan Ruak, prezide reuniaun Konsellu Ministru, iha Palásiu Governu, kuarta (19/08). Imajen Tatoli/Egas Cristovão

DILI, 19 agostu 2020 (TATOLI)-Governu liuhosi reuniaun Konsellu Ministru (KM) aprova projetu dekretu-lei, ne’ebé aprezenta hosi Ministru Administrasaun Estatál, Miguel Pereira de Carvalho, kona-ba Estatutu Administrasaun Munisipál.

Dekretu-lei ne’e refere ba alterasaun daruak Estatutu Administrasaun Munisipál, ne’ebé espesífiku liu ba Autoridade Munisipál no Grupu Tékniku Interministeriál ba desentralizasaun administrativa.

“Alterasaun ne’e mai atu muda maski parsiál de’it, prosesu kona-ba konsentrasaun administrativa ba rekursu umanu, ne’ebé rezulta hosi alterasaun dahuluk ba estatutu ne’e,” dehan Ministru Prezidénsia Konsellu Ministru, Fidelis Manuel Leite Magalhães, hafoin reuniaun ezekutivu iha Palásiu Governu, kuarta ne’e.

Desizaun ne’e ho intensaun atu solusiona konstranjimentu jurídiku no operasionál sira hanesan kompeténsia sira, organizasaun no funsionamentu hosi serbisu munisipál sira, inklui nomeasaun liuhosi substituisaun ba dirijente no xefia sira.

Governante ne’e hatutan, diploma ne’e inklui mós alterasaun kona-ba Konsellu Konsultivu Munisipál sira, liuliu ba ninia kompozisaun.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here